Nga Dritan Hila/A shpëton Shqipëria po u zhduk PD-ja?

29 Mars 2017, 20:36, Aktualitet CNA

Në prag të fushatës elektorale dhe të polarizimit që ka marrë ajo, është e vështirë ruajtja e gjykimit të ftohtë. Ca më e vështirë kur tashmë vihen realisht në balancë përfitimet që sjell pushteti nga njera anë, dhe rreziku për katër vjet të tjera opozitë nga ana tjetër.

Dhe në këtë vorbull është e kuptueshme rritja e presionit mbi Lulzim Bashën. Ndërkohë që pozicioni i tij ka mbetur intrasigjent, dhe nuk bën hap pas, vetëm se me qeveri teknike.

Ndërkohë mesa u kuptua, heqjen e Saimir Tahirit, qeveria as u lodh ta shiste si shenjë kompromisi, dhe ajo është në llogoren e saj pa bërë pas asnjë centimetër. Të gjithë presin lëvizjen e LSI, duke menduar se ajo është çelësi i zgjidhjes, dhe jo pa të drejtë. Por ndërkohë vetë Meta nuk mund t?i lejojë vetes një veprim të pamenduar i cili mund ta shuajë nga harta politike.

Ajo që bie më shumë në sy është presioni në rritje ndaj Bashës. Lulzim Basha e ka gjithë erën kundër. Ashtu si në të shkuarën, kur PS ishte në opozitë, edhe tani ndërkombëtarët janë me pushtetin. Atëhere PS doli nga çadrat pa marrë asnjë kompensim. Të njëjtën gjë mendojnë se mund të ndodhë me Bashën. Njerëzit mendojnë se Bashës nuk do t?i ofrohet as kafe, jo më darkë, nga ndërkombëtarët. Madje kërcënohet se do të shkohet në zgjedhje me apo pa Bashën pjesëmarrës.

Edhe zërat që mundoheshin të ruanin ekuilibrin e kanë humbur qetësinë dhe kërkojnë raprezalje ndaj PD-së. Madje urojnë shuarjen e PD-së.

Janë jo vetëm armiqtë e betuar të saj, por edhe njerëzit e thjeshtë, që janë lodhur nga Berisha. Por kjo nëse nuk është e stimuluar nga pushteti në rrafshin e luftës psikologjike, mbart në vetvete një rrezik të madh. Shqipëria nuk e ka luksin të humbasë një parti të madhe. Një vend ku gjërat shihen bardh e zi dhe njerëzit janë të prirur për të qenë konformistë, eleminimi i një force politike që ka 600 mijë e kusur votues, e ka shumë të vështirë të ngrejë një forcë të re opozitare të rëndësishme.
Një dalje e PD jashtë sistemit do të mbillte një krizë të re dhe daljen e revoltave jashtë kontrollit. Do të ishte çudi edhe për një popull të nënshtruar si shqiptarët që kriza mos shfrynte diku. Sepse emigracioni nuk është valvul shkarkimi për të gjithë. Mos harrojmë se ?97-ta nuk ishte një revoltë e krijuar nga PS. Ishte fat që më vonë u përdor nga ajo.

Por edhe në rastin më të mirë, që mospjesëmarrja në zgjedhje do të sillte shuarjen e PD-së dhe mundësinë e lindjes së një force të re, është infantile. Në hapësirat e lindjes evropiane dhe ca më shumë në Ballkan, e vetmja perspektivë e sigurtë është autoritarizmi. Dhe nëse nuk kemi kuptuar se demokracia nuk është punë njerëzish, po punë institucionesh, ku më i rëndësishmi është opozita, atëhere nuk kemi kuptuar asgjë në këto 25 vjet./dritare.net