web counter
LEXO PA REKLAMA!

SHKARKO APP

App Store
Google Play

Nishanit i akordohet titulli "Doktor Nderi" nga universiteti i Azerbajxhanit

17 Mars 2017, 13:53, Aktualitet CNA

Presidentit të Republikës, Bujar Nishani, në kuadrin e pjesëmarrjes në edicionin e pestë të Forumit Global të Baku-së, zhvilloi sot një vizitë edhe në Universitetin shtetëror Filologjik të Azerbajxhanit, ku nga rektori në detyrë i këtij universiteti,  Afgan Ali Abdullayev, iu akordua, në një ceremoni të veçantë, Titulli ?Doktor Nderi?, titull i cili i është akorduar një sërë personaliteteve evropiane dhe botërore nga ky universitet dhe i pari që i akordohet një presidenti shqiptar.

Presidenti Nishani falënderoi trupën drejtuese dhe akademike të Universitetit për titullin e akorduar, si dhe përshëndeti studentët e shumtë, azerë dhe të huaj, të pranishëm në këtë ceremoni.

Në mesazhin drejtuar auditorit, presidenti Nishani përgëzoi trupën akademike për vijimin e traditës së bukur të krijuar nga akademikët dhe profesorët azerë afro një shekull më parë, si dhe theksoi se fuqia që studentët marrin në auditoret e këtij universiteti e bën më të lehtë ndërveprimin mes kulturave të ndryshme, dhe për më tepër mes dy popujsh të vjetër, shqiptarëve dhe azerëve.

Kreu i Shtetit shprehu gjithashtu kënaqësinë dhe vlerësimin për marrëdhëniet shumë të mira e intensive mes dy vendeve, veçanërisht në dy vitet e fundit, si dhe theksoi se më shumë duhet bërë edhe në rritjen e shkëmbimeve kulturore dhe arsimore. ?Do të ishte ideale që dy vendet të rrisnin me sa mundësi kanë shkëmbimin e studentëve dhe të eksperiencave të vlefshme akademike?, u shpreh presidenti Nishani.

Presidenti Nishani iu përgjigj më pas interesimit të studentëve lidhur me bashkëpunimin dhe aspektet që i afrojnë dy vendet me njeri-tjetrin, si dhe la një shënim të shkurtër edhe në librin e miqve të Universitetit shtetëror Filologjik të Azerbajxhanit.

Në mbyllje të vizitës në universitet, presidenti Nishani, iu përgjigj dhe interesit të mediave vendase, të cilat gjithashtu u interesuan mbi nivelin e marrëdhënieve mes dy vendeve dhe të ardhmen e këtij bashkëpunimi. /CityNews

 





Lajmet e fundit nga