E fundit!

11:24 Aktualitet

Bordi i Transparencës merr vendimin/ Ja çmimet e reja për karburantet

Bordi i Transparencës ka njoftuar se çmimi i shitjes me pa...

Fundi i një miqësie të mrekulleshme?

13 Mars 2017, 18:11, Aktualitet CNA

Trumpi do të ngrejë jo vetëm mure të vërteta, edhe ekonomikisht ai do t’i mbyllë në vete SHBA. Merkeli do ta kundërshtojë këtë në vizitën e saj në Uashington. Po edhe të tjerë do të vuanin nën një Amerikë të izoluar.

Një luftë ndërkombëtare tregtare mund të shkaktojë Donald Trumpi me politikën e tij të tregtisë së jashtme, kjo është frika më e madhe që kanë shumë ekonomistë që kur ai ka ardhur në pushtet. Vërtet që deri tani nuk ka ndodhur gjë, por shumë deklarata të Presidentit të ri të SHBA shkojnë në një drejtim të qartë: izolimi nga ekonomia botërore. Trumpi dëshiron të importojë më pak mallra nga shtete të tjera dhe të forcojë në këtë mënyrë prodhimin vendas. “Ne duam të vendosim tatime për importet nga ato shtete, me të cilat kemi deficit në tregtinë e jashtme”, thotë Sean Spicer, zëdhënësi i Shtëpisë së Bardhë. Një taksë e tillë, e cila në bazë të deklaratave të Trumpit do të jetë rreth 20 përqind, në fund të fundit do të bëjë efektin e doganës mbi mallrat e huaja.

A do të paguajë çmim Gjermania për qejfin e saj për të eksportuar?

Firmat gjermane shitën vitin e fundit në SHBA, në bazë të shifrave jopërfundimtare të Zyrës Federale të Statistikave, mallra në vlerë prej 107 miliardë dollarësh. Kjo shumë është dyfishi i asaj që u importua nga SHBA. Goditjet paralajmëruese proteksioniste nga Uashingtoni pra me siguri që i drejtohen edhe Gjermanisë.

Barrierat tregtare do ta preknin rëndë ekonominë gjermane. Nga njëra anë sepse ajo është veçanërisht e prekur nga eksportet – rreth 40 përqind ishte pjesa e eksporteve në rendimentin e përgjithshëm ekonomik të vendit vitin e kaluar. Dhe nga ana tjetër, sepse Shtetet e Bashkuara janë për sipërmarrjet gjermane tregu më i fuqishëm i eksportit – rreth dhjetë përqind e eksporteve gjermane shkojnë atje.

Në rrezik: vendet e punës në Gjermani dhe në SHBA

“Shpresa është që të kemi të bëjmë me manovra kërcënuese dhe me retorikë agresive – dhe që fjalët të mos pasohen nga vepra”, tha Jürgen Matthes nga Instituti i Këlnit i Ekonomisë Gjermane në bisedë me DW. Por pas të gjitha atyre që kanë ndodhur që prej ardhjes në pushtet të Trumpit, pasiguria është shtuar.

Në rastin më të keq në Gjermani do të ishin në rrezik deri 1,6 milionë vende pune, shkroi Clemes Fuest, President i Institutit Ekonomik ifo para pak kohësh në Frankfurter Allgemeine Sonntagszeitung. Kjo në një kohë kur Presidenti i SHBA nuk duhet të harrojë: 600.000 nga këto vende pune janë të sipërmarrjeve amerikane në Gjermani. Kështu që po të ndëshkonte Gjermaninë, ai do të ndëshkonte edhe ekonominë e vet.

Të gjitha kanë të bëjnë me njëra-tjetrën

Në përgjithësi, planet e Trumpit janë thikë me dy presa. Zinxhirët e prodhimit të shumë sipërmarrjeve nuk kalojnë më vetëm përmes një vendi. Ekonomia e SHBA është e varur nga produkte të shteteve të tjera. Po të tatohet importi i tyre, do të shtrenjtohej i gjithë prodhimi dhe në këtë mënyrë edhe produktet përfundimtare.

“Mund të ndodhë që me një politikë të tillë Trumpi të dëmtojë veten, sepse në këtë mënyrë rrezikohen vendet e punës në SHBA”, thotë Andre Wolf nga Instituti i Ekonomisë Botërore në Hamburg në bisedë me DW. “Konsumatorët dhe të gjitha sipërmarrjet e SHBA, të cilat janë të varura nga importet, me siguri që do të vuajnë nën shpenzimet më të mëdha”, i tha ai DW-së. “Një vend më tepër dëmton veten, kur aplikon barriera doganore të këtyre përmasave. Ky është mendimi i shumicës së ekonomistëve.”