Avokatja e Shtetit ka lajthitur!/ Nesër kallëzim penal ndaj saj

13 Shkurt 2017, 18:03, Aktualitet CNA

Partia Demokratike do të kallëzojë nesër në Prokurorinë e Tiranës Avokaten e Shtetit, Alma Hiçkën.

Në një reagim, PD sqaron se kallëzimi vjen pas shkresës së Avokates, e cila i kërkoi policisë arrestimin e Edmond Spahos.

Sipas reagimit nga selia blu, kjo është një lajthitje që ka vetëm një shpjegim, Avokaten e Shtetit dhe shefin e saj i ka zënën tmerri.

Ja deklarata e plotë e PD:
Avokatja e shtetit, një zyrë e rëndësishme që varet drejtpërdrejt nga Edi Rama ka nxjerrë sot në mesditë një shkresë ku i kërkon policisë së Tiranës të arrestojë në flagrancë z. Spaho, sepse ky i fundit e ka thirrur të dëshmojë në komisionin hetimor parlamentar për cështjen CEZ.
Kjo lajthitje ka vetem një shpjegim. Avokaten e shtetit dhe shefin e saj i ka zënë tmerri.
Frika nga hetimi i kësaj cështje, përfshirja e saj direkt në këtë aferë, ka bërë që avokatja e Edi Ramës të kryejë veprime të dëshpëruara, si ky i sotmi.
Hicka ka treguar vazhdimisht se është avokate e aferës, e vjedhjes së shekullit që u është bërë shqiptarëve, me 600 milionë euro, dhe nuk ka treguar asnjë ditë që është avokate e shtetit.
Avokatja e aferës, është kapur po ashtu në konflikt interesi, pasi në mënyrë të turpshme kishte ndarë rolet me bashkëshortin e saj avokat jo vetëm në cështjen CEZ, por dhe në shumë të tjera duke sjellë përfitime për burrin dhe dëme për shtetin.
Letra e saj sot dërguar policisë është shprehje e rënies së cdo standardi, prova e arrogancës, e qendrimit mbi ligjin dhe delirit të qeverisë. Por edhe provë klinike e tmerrit të Edi Ramës nga zbardhja e Vjedhjes së Shekullit.
Kot e kanë, kjo nuk ka për ti shërbyer avokates së aferës, dhe as atyre që ajo mbron, si Rama e Gjinkuri, që të shpëtojnë nga hetimi e nga drejtësia për vjedhjen më të rëndë të bërë në kurriz të shqiptarëve.
Partia Demokratike do të depozitojë nesër një kallëzim penal ndaj avokates së aferës për këtë akt të rëndë që ka kryer sot.
Ora e llogaridhënies po vjen. Me 18Shkurt nis një rrugë e re, nis rrëzimi i arrogancës e delirantëve të qeverisë dhe kthimi i pushtetit tek qytetarët./CityNews