Nga Kastriot MYFTARAJ/UNHCR ndërpret financimin për strehimin e muxhahidinëve iranianë në Shqipëri

12 Shkurt 2017, 21:54, Aktualitet CNA

Duke nisur që nga 1 shkurti i vitit 2017, agjencia e OKB për refugjatët, UNHCR ka ndërprerë financimin e shpenzimeve të strehimit në Shqipëri të mbi 3000 muxhahidinëve iranianë të organizatës MEK (Muxhahidinët e Popullit Iranian). Vendimi i UNHCR erdhi pas zgjedhjeve presidenciale në SHBA, ku humbi Hillary Clinton, mbrojtësja e madhe e MEK, për shkak se paguhej nga lobby saudit në SHBA.
Nuk mund të mos vihet re fakti se UNHCR është kujdesur që vendimi të hyjë në fuqi pak ditë pas largimit nga Shtëpia e Bardhë të Obamës, një tjetër mbrojtës i madh, i paguar me petrodollarë sauditë, i muxhahidinëve iranianë.
Kontraktuesve privatë shqiptarë me të cilët UNHCR ka kontrata për strehimin e muxhahidinëve, iu ka bërë të ditur se pas 1 shkurtit shpenzimet do t? i paguajë vetë organizata MEK. Është fjala për qiranë e ndërtesave ku janë strehuar muxhahidinët, pagesën e energjisë elektrike, ujit, internetit, taksave vendore për pastrim, ndriçim publik etj.
Në Shqipëri, muxhahidinët janë sistemuar në katër qendra, nga të cilat dy janë anash Autostradës Tiranë-Durrës, në pesë-gjashtë kilometrat e parë të saj (Mëzez), një tjetër në Vaqarr, matanë Sharrës, në Tiranë, dhe një tjetër në Durrës, në zonën e plazhit.
Largimi i UNHCR si partner ndërkombëtar, ndërmjetësues mes shtetit shqiptar dhe muxhahidinëve iranianë, krijon probleme të mëdha, pikëpsëpari juridike, në marrëdhëniet me ta. Si do të rregullohen ligjërisht marrëdhëniet me muxhahidinët e strehuar në vendin tonë, pas 1 shkurtit të këtij viti? A do të jenë qytetarët shqiptarë, sipërmarrës, të cilët kanë kontrata me UNHCR, që do të bëjnë kontrata me MEK? Apo do të jetë qeveria shqiptare që do të bëjë një kontratë me MEK dhe sipërmarrësit shqiptarë do të bëjnë kontrata me qeverinë shqiptare? Për të gjitha këto pyetje, UNHCR nuk jep asnjë përgjigje, duke mos e quajtur madje detyrë të saj këtë gjë.
Gjithçka varet nga marrëveshja me të cilën muxhahidinët janë strehuar në Shqipëri. Pra, a kemi strehuar individë, ish-anëtarë të një organizate terroriste, apo kemi strehuar një organizatë të përbërë nga anëtarë? Dallimi është thelbësor. Sepse në rastin e dytë, pra kur shteti shqiptar ka pranuar të strehojë një organizatë, krijohen probleme të shumëllojshme, dukeni nisur që nga ata juridikë.
Sipas ligjeve shqiptare në fuqi (Ligji nr. 8788, dt. 7.5.2001, ?Për OJF-të?), që një organizatë e huaj të ushtrojë veprimtarinë e saj, të përhershme ose të përkohshme (për më shumë se 30 ditë) në territorin e Republikës së Shqipërisë, duhet të regjistrohet pranë Gjykatës së Tiranës, si OJF, ose si degë e një OJF-je. Me këtë rast, ndër të tjera duhet të paraqitë aktin e themelimit dhe statutin me të cilin është miratuar në vendin ku është krijuar, përvec aktit të themelimit dhe statutit që do të paraqesë për veprimtarinë e saj në Shqipëri. Përjashtim bëhet në rastet kur ka marrëveshje dypalëshe ose shumëpalëshe ndërshtetërore (më së shumti rasti i organizatave ndërkombëtare), gjë që nuk është rasti i MEK. Në çdo rast, shteti shqiptar ka detyrim ligjor që të kontrollojë të ardhurat e MEK dhe burimin e tyre, ashtu siç bën me qytetarët shqiptarë të cilët sjellin apo iu vijnë para nga jashtë vendit.
Nuk e di nëse MEK është regjistruar pranë Gjykatës së Tiranës, dhe nuk besoj që ta kenë bërë këtë marrëzi (gjithsesi për këtë do të kërkoj të informohem zyrtarisht nga Gjykata e Tiranës), sepse ligji i mësipërm nuk parashikon regjistrimin e organizatave paramilitare. MEK është një organizatë ushtarake e cila ka si program të shpallur botërisht përmbysjen e regjimit në fuqi në Iran. Kështu që veprimtaria e saj bie ndesh jo vetëm me ligjin e sipërpërmendur, por edhe me ligje të tjera në fuqi, si Neni 265/a i Kodit Penal që ndalon pjesëmarrjen në luftra të huaja. Është e vërtetë që anëtarët e MEK janë shtetas iranianë, por që nga momenti që ata janë strehuar në Shqipëri kanë detyrim që të ndërpresin veprimtarinë e mëparshme dhe të deklarojnë botërisht se kanë hequr dorë nga qëllimet e mëparshme, ndryshe e ekspozojnë shtetin shqiptar para rrezikut të ndëshkimit nga ana e shtetit kundër të cilit kryhet veprimtaria e tyre.
Pavarësisht se MEK nuk është më e listuar si organizatë terroriste nga OKB, fakti që MEK ka si qëllim të shpallur përmbysjen me dhunë të regjimit në fuqi në një vend anëtar të OKB-së, bën që MEK të jetë në luftë me një vend anëtar të OKB-së, Iranin, i cili ka të drejtë ta quajë si armik vendin që strehon MEK.
Nëse MEK do të ushtrojë veprimtarinë e saj në Shqipëri si organizatë e paregjistruar sipas ligjeve shqiptare, kjo do të thotë se qeveritarët shqiptarë dhe drejtuesit e MEK bëhen përgjegjës për një tufë të bukur veprash penale.