Dështimi i Saimir Tahirit dhe mbrojtja “e turpshme” që i bën Rama!

9 Shkurt 2017, 17:35, Aktualitet CNA

Vetëm një ditë para se maskat të rikthehen frikshëm, po në të njëjtin vend dhe po me të njëjtin skenar, ministri i Brendshëm, Saimir Tahiri, zhvilloi një takim me shoqëritë private të sigurisë. Gjatë këtij takimi, ministri Tahiri premtoi se asnjë polic privat nuk do të paguhet më me 180 mijë lekë. Sipas tij, paga minimale për çdo polic privat do të jetë 330 mijë lekë, teksa shprehu bindjen se nuk do të lejohet më kjo situatë. Por, vetëm një ditë pas këtij premtimi, policët privatë ?lëshuan? mbi 100 mijë euro në rrugën e Rinasit, ku 5 grabitës me maska arritën t?iu marrin 7 thasët me para të një banke të nivelit të dytë.

Ngjarja duket se nuk e ka shqetësuar aspak ministrin e Brendshëm, i cili vijon ende të heshtë bashkë me kryeministrin, ndonëse u grabitën mijëra euro. Problemi bëhet akoma më shqetësues kur, në një retrospektivë të shkurtër kohore, kujtojmë edhe 3 grabitje të tilla, me shuma galopante parash, dhe ku dyshohet edhe me të njëjtët autorë. Një qeveri e paaftë, që nuk mund të arrestojë grabitësit, që jetojnë të qetë dhe hidhen në sulm sa herë lëvizin makinat e policëve privatë me shuma të mëdha parash. Një deputet i Edi Ramës shprehej se bankat bashkëpunojnë me grabitësit. Por kreu i LIBRA, Ben Blushi, i cili deri para pak kohësh ishte pjesë e qeverisë Rama, shkon edhe më tej kur shkruan në rrjetet sociale se shteti bashkëpunon me grabitësit. Një ngjarje e përsëritur disa herë hedh dyshime të forta të një bashkëpunimi të mundshëm mes shtetit dhe grabitësve, ose rrjedhimisht çon te dështimi total i ministrit të Ramës.

Saimir Tahiri dështoi në arrestimin e trafikantit të shpallur në kërkim ndërkombëtar, Klement Balili. Dështoi në asgjësimin e kanabisit, ku me ardhjen e tij në detyrë, Shqipëria lulëzoi si asnjëherë më parë nga droga, duke alarmuar dhe mbarë Evropën. Ministër i dështuar në rritjen e sigurisë, ku maskat grabisin shuma të mëdha parash në mes të ditës dhe në rrugën më kryesore të vendit.

Por, ai vijon të mbetet ndër ministrat e ?preferuar? të Ramës, i cili nuk harron në asnjë çast t?iu bëjë jehonë ?sukseseve? të ministrit dështak. Ashtu si në rastet e mëparshme, edhe pas kësaj super grabitje nuk do të ketë asnjë vendim nga kryeministri, përveç ndonjë reagimi qesharak në rrjetet sociale, ku me siguri do mbrojë ministrin./CityNews