Si t’i shpëtojmë plakjes së parakohshme?

27 Janar 2017, 08:30, Lifestyle CNA

E përbashkëta e plakjes së trupit, e të gjitha qelizave, është dëmtimi i qelizave nga të ashtuquajturat ?radikale të lira?. Pra, çka janë radikalet e lira? Çdo qelizë është si një fabrikë, e cila realizon shumë funksione jetike, gjeneron energji, prodhon proteina, enzima, depoziton informata.

Radikalet e lira janë mbetje të metabolizmit të funksioneve të ndryshme të qelizës, janë substanca tejet reaktive të cilat, nëse nuk eliminohen, dëmtojnë çdo gjë brenda qelizës. Ato e shkatërrojnë qelizën posi pika e ujit që e zbërthen një shkëmb të granitit, duke e goditur pika, pika për një kohë të gjatë.

Radikale të lira konsiderohen ajri i ndotur, tymi i duhanit, rrezet e diellit, lëndët kimike, disa ilaçe, produktet e prishura dhe disa përbërës që gjenden tek ushqimet. Këto hyjnë në trupin tonë edhe kur marrim frymë apo hamë bukë dhe dëmtojnë shëndetin.

Fatmirësisht organizmi ka sisteme mbrojtëse dhe ripërtëritjeje. Keni dëgjuar për ?antioksiduesit?, se sa të mirë janë ata për trupin tonë?

Antioksiduesit janë substanca të cilat neutralizojnë efektet e dëmshme të radikaleve të lira. Ato janë pjesë e sistemit mbrojtës të organizimit tonë.

Imagjinoni një frut të ndarë me thikë në feta. Nëse i lëmë në tavolinë për një farë kohe, fruti do të fillojë të nxihet. Kjo ndodh sepse qelizat e tij kanë filluar të oksidohen në momentin që ato kontaktojnë me oksigjenin. Nëse mbi frutin, para se te nxihej do të shtrydhnim lëng limoni, ai do të nxihej me një ritëm më të ngadaltë. Lëngu i limonit vepron si antioksidues duke parandaluar dëmin ndaj qelizave të frutit.

Antioksidantët kanë një efekt të ngjashëm mbrojtës ndaj qelizave të trupit. Por, një sistem i tillë mbrojtës, dëmtohet shumë lehtë nën ndikim të faktorëve të jashtëm; ushqimit jo të shëndetshëm, ekspozimit konstant në helmet ambientale, mungesën e aktivitetit fizik.

Dhe atëherë si pasojë paraqiten sëmundjet e trurit, sëmundja e sheqerit, kanceri, sëmundjet reumatike, sëmundjet autoimune, sëmundjet e zemrës, pika në tru etj. Nëse jo sëmundjet, atëherë plakja vjen, shumë herët dhe shumë shpejt, me të gjitha pasojat e saj.