Skandali në Fiks fare/ Zjarrfikesit në mëshirë të fatit, blejnë uniformat dhe mjetet me lekët e tyre

12 Janar 2017, 20:05, Aktualitet CNA

Shefi i emergjencave: Në vend të makinave zjarrëfikëse, montojmë fuçi uji mbi kamiona

Shërbimi për Mbrojtjen dhe Shpëtimin Ndaj Zjarrit është lënë në harresë për shumë kohë . Ai “mbahet në këmbë” me automjete të amortizuara ose të paregjistruara. Këtë fat duket se e kanë të gjitha Zjarrfikëset në vend. Veç kësaj, problematike mbetet numri i reduktuar i punonjësve , mungesa e uniformave të zjarrit dhe sistemit të ndërlidhjes . “Heronjtë” shqiptarë madje janë detyruar të vënë para nga xhepi i tyre për të riparuar defektet e automjeteve të viteve ?70 ??80.

Fiksi shkoi në disa qytete për të parë nga afër gjendjen dhe infrakstrukturën në të cilat PMZSH-të punojnë he japin ndihmën e shpejtë.

Në Prrenjas, emergjencat civile e japin ndihmën e shpejtë me depoziat uji të montuara mbi kamion

Fiks Fare ka qënë në Bashkinë e Prrenjasit e cila nuk ka shërbim Zjarrfikës. Banorët shprehen se në të gjitha rastet i kanë shuar vetë zjarret pasi edhe shërbimi që ju ofrohet nga Librazhdi vjen me 4 orë vonesë. ? Patëm një rast para disa kohësh ku u dogj një biznes këtu afër , kur mbërriti Zjarrfiksja e Librazhdit pas 4 orëve ne e kishim shuar vetë zjarrin? u shpreh një banor. Sipas drejtorit të Shërbimeve Sociale dhe Emergjencave Civile Nebi Muçaj, situatat e zjarrit janë zgjidhur me mënyra alternative. Muçaj shpjegon se mungesa e infrastrukturës në pajisje si dhe asaj rrugore e cila e vonon dhënien e ndihmës nga Librazhdi, ka bërë që fikja e zjarreve të bëhet nga depozitat e ujit të cilat montohen mbi kamionë. “Kemi ndërhyrë vetë sidomos kur bëhet fjalë për pyjet. Në kamionë të mëdhenj kemi montuar depozita me ujë dhe me pomë kemi shuar zjarret. Vjet humbëm rreth 30 hektarë pyje, pjesën tjetër e shpëtuam në këtë mënyrë” shprehet ai. Situata sipas Muçajt është më e vështirë kur bëhet fjalë për të ndërhyrë në rastet e aksidenteve rrugore të cilat janë të shumta. “Ne nuk kemi pajisje për të ndërhyrë ,por edhe Librazhdit i mungojnë totalisht” thotë ai. Lidhur me këtë problematikë Muçaj pohon se është çelur një fond nga qeveria shqiptare prej 70 milion lekësh të vjetra të cilat mjaftojnë vetëm për rrogat e 9 punonjësve. Ndërsa përsa i përket pajisjeve ,automjeteve si dhe godinës ai thotë se nëpërmjet fondit që do të çelë Bashkia e Prrenjasit si dhe me ndihmë të partnerëve italianë do t?i jepet një zgjidhje dhe këtij problemi.

Librazhd, zjarrfikësja e vitit 1964

Punonjësit blejnë uniformat dhe mjetet me lekët e tyre

Në stacionin e Zjarrfikësve të Librazhdit i cili mbulon veç dy bashki atë të Prrenjasit dhe Librazhdit edhe fshatrat përreth situata është e mjerueshme . Ky stacion ka vetëm dy automjete, një i përket vitit 1964, totalisht të amortizuara. Shefi i këtij shërbimi Vladimir Duro e pohon këtë fakt, madje thotë se prej vitesh nuk është investuar fare në këtë shërbim. Automjetet sipas tij tashmë janë jashtë çdo standarti. Dhe numri i punonjësve është zvogëluar. Në bazë të ligjit në 1500-2000 banorë duhet të ketë 1 zjarrfikës. Nesë ligji do të zbatohej shërbimi do ishte shumë herë më i mirë, porn kostot janë të larta ndaj e bëjnë atë të pamundur. Kështu edhe Zjarrfiksja e Librazhdit nga 14 punonjës që duhet të kishte ka vetëm 9. Duro tregon se të gjithë punonjësit për të mbajtur në këmbë këtë shërbim kanë investuar para nga xhepi i tyre për stacionin duke blerë deri tek tavolinat, karriket si dhe mjetet e kuzhinës. Ky stacion sipas shefit ka pasur një fond prej 4 milion lekësh të cilat janë shpenzuar për të bërë shërbimet më kryesore të makinave. ?Ende nuk janë rregulluar totalisht nga amortizimi i madh i tyre? citon Duro. Në stacion ka edhe një autoambulancë e cila është jashtë funksionit, pasi nuk ka asnjë mjet në brendësi dhe as bombël oksigjeni për të ndërhyrë. Një tjetër problematikë me të cilën hasen zjarrfikësit e Librazhdit është terreni i vështirë nëpër fshatra, Duro thotë se është e pamundur të ndërhysh. “Terreni i fshatrave është malor dhe e vështirëson më shumë ndërhyrjen . Ne ka pasur raste kemi shkuar në qendër të fshatit, por s?kemi shkuar dot më tutje, as tubo s?kemi” shprehet ai. Në këtë stacion prej vitesh punonjësit nuk pajisen me uniforma si dhe mungon sistemi i ndërlidhjes. Zjarrëfiksit komunikojnë në terren nëpërmjet telefonit celular .

Elbasan, 3 bashki me 5 makina

Në vend të radiove, përdorin celularë

Amortizimi i automjeteve, mungesa e sistemit të ndërlidhjes si dhe e uniformave ka prekur edhe stacionin e Zjarrfikses në Elbasan. Ky i fundit mbulon veç bashkisë së qytetit edhe Bashkinë e Belshit dhe Cërrikut. Tajar Alla, shef i shërbimit tregon se edhe pse 5 -së makinat që ka ky stacion janë të amortizuara nëpërmjet shërbimeve të shpeshta ato janë funksionale . “Janë makina të vjetra të viteve ?70-?90-?92 ne i kemi bërë servis herë pas here. Shërbimi kushton sepse janë pjesë që mezi gjenden dhe janë të shtrenjta” shprehet ai. Përsa i përket sistemit të ndërlidhjes Alla tregon se dikur ka pasur, por aktualisht ai bëhet nëpërmjet telefonave. Problemin e mungesës së uniformave Alla thotë se e kanë zgjidhur duke marrë dhurime nga shoqata të ndryshme.” Uniforma kemi marrë për herë të fundit nga shteti në 2007, por herë pas here kemi marrë dhurata ,donacione të ndryshme” shprehet ai.