Thellohet skandali i Lindita Nikollës/Bllokon për të katërtin vit doktoraturat për universitetet publike

21 Dhjetor 2016, 08:23, Aktualitet CNA

Lindita Nikolla vijon penalizimin e universiteteve publike në vend dhe favoret ndaj universiteteve private. Prej tre vitesh tashmë, që në kohën kur PS erdhi në pushtet, menjëherë u pezulluan kuotat për ciklin e tretë të studimeve, doktoraturat, në universitetet publike me pretekstin se ata nuk plotësonin kushtet dhe kriteret duke futur si element akreditimin e universiteteve.

Tashmë jemi në mes të muajit dhjetor dhe treguesit janë që edhe për këtë vit kuotat për doktoratura në universitetet publike nuk do të ketë. Drejtuesit e disa fakulteteve në vend, si ai i Ekonomisë apo Histori-Filologjisë konfirmojnë se ende nuk kanë një informacion nga MAS nëse do të akordohen kuota për doktoraturat.

Fakultetet janë në pritje të vendimit të Këshillit të Ministrave prej kohësh, por deri tani nuk ka pasur asnjë zhvillim konkret apo sinjal se do të zhbllokohen kuotat për ciklin e tretë të studimeve që janë bllokuar prej tre vitesh. Të gjitha të dhënat të bëjnë të mendosh se në universitetet publike do të jetë edhe një tjetër vit pa doktoratura, çka do ta çonte në katër vite bllokimin e tyre.

Ndërkohë, tjetër qëndrim Ministria e Arsimit ka mbajtur me universitetet private në vend. Për këto të fundit, MAS ka miratuar programet dhe procedurat për një universitet, ndërsa për dy të tjetrit janë në proces. Vlen të theksohet se kjo nuk është hera e parë që ministrja e Arsimit, Lindita Nikolla, shfaq ?dashamirësinë? e saj ndaj universiteteve private në vend në kurriz të atyre publike, shekruan Gazeta SOT.

Në vijimësi të vendimeve dhe të qëndrimeve të saj, MAS këto katër vitet e fundit ka marrë vendime që kanë favorizuar arsimin privat në dëm të atij publik. Pas favorizimit me pranimet në universitete këtë vit, ku universitetet private duhet të vendoseshin në listën e dhjetë të preferencave nga maturantët dhe pas akreditimit të dy universiteteve private në vend, të cilat u akredituan të parat, duket se Ministria e Arsimit ka vendosur që favorizimi i radhës për to të jetë pikërisht me kuotat e akorduara për doktoraturat. Pavarësisht akuzave dhe qëndrimeve si nga opozita ashtu edhe nga shoqëria civile, duket se Ministria e Arsimit nuk ka ndërmend të ndërpresë politikën e favorizimit të universiteteve private në vend.