web counter
LEXO PA REKLAMA!

SHKARKO APP

App Store
Google Play

Meta thyen akullin/ Në koalicion s’duhet të merren vendime të njëanshme, retorikat nacionaliste nuk e ndihmojnë vendin

4 Dhjetor 2016, 08:33, Aktualitet CNA

Kreu i LSI-së, Ilir Meta, vijon ende të mbajë qëndrim të paqartë sa i takon vijimit ose jo të bashkëpunimit me Partinë Socialiste edhe në 2017.

Por sipas gazetës ‘Sot’, Meta dje ka thyer akullin duke i dhënë një mesazh të qartë kryeministrit Edi Rama. Kryeparlamentari ka theksuar se në koalicion nuk duhen të merren vendime të njëanshme, por të konsultohen me aleatët brenda koalicionit për të shmangur konfliktet.

Këtë deklaratë Meta e ka bërë gjatë fjalimit të tij në Konventën Kombëtare Zgjedhore.

?Ne i kemi qëndruar besnikërisht koalicionit me PS duke qenë bashkëpunues, të hapur, moderuar, konsensual, të drejtë dhe të ndershëm në fjalët dhe veprimet tona; duke pasur si busull interesat, të drejtat dhe detyrimet ndaj qytetarëve të këtij vendi, me një orientim të qartë dhe të palëkundur evropian. Por, duhet të ketë një përpjekje të vazhdueshme për të dëgjuar njëri-tjetrin. Për të mësuar nga njëri-tjetri. Për të respektuar njëri-tjetrin dhe për të gjetur gjuhën e përbashkët. Pasi aktet ose politikat e njëanshme, të nxituara prodhojnë tensione të panevojshme, jo thjesht brenda koalicionit, por edhe me grupet e interesit?, ka theksuar Meta. Ai është shprehur se koalicioni ka ende për të dhënë, por duhet të respektohet konsensualiteti për të gjitha reformat që do ndërmerren. ?Unë vlerësoj se koalicioni ynë ka akoma potencial të lartë, por të pashfrytëzuar ende, për të krijuar një sinergji dhe dinamikë më të lartë në plotësimin e premtimeve zgjedhore dhe përballimin e sfidave zhvillimore. Janë shënuar padyshim mjaft arritje, por për mendimin tonë, në asnjë rast nuk ka vend për vetëkënaqësi. Nga marrëveshja rrjedh edhe detyrimi i konsensualitetit për formulimin dhe zbatimin e politikave qeverisëse, parim që në të ardhmen duhet respektuar dhe forcuar më shumë?, tha Kreu i LSI-së./ Citynews





Lajmet e fundit nga