E fundit!

09:48 Ekonomi

Kriza e prodhimit bujqësor/ Sfidat dhe pasiguritë në sektorët kryesorë

Sektori i bujqësisë përballoi një vit mjaft sfidues gjatë ...

Socialistët braktisin Kokëdhimën/ Bojkotohet lëvizja e tij brenda PS

3 Dhjetor 2016, 09:17, Aktualitet CNA

Ish-deputeti socialist, Koço Kokëdhima, duket se kërkon të rikthehet me cdo kusht në politikë. Ai ka publikuar pak ditë më parë lëvizjen e tij brenda PS duke kryer disa takime me një numër të vogël socialistësh në Sarandë.

Por, baza socialiste në Jug të vendit e ka braktisur përfundimisht Kokëdhimën bashkë me lëvizjen e tij të re për reformim. Së fundmi, ai është bojkotuar nga socialistët e Vlorës dhe Gjirokastrës.

Degët e PS në Jug kanë dalë tashmë hapur kundër ish-deputetit. Kreu i Partisë Socialiste në Vlorë, Anduel Tahiraj, ka deklaruar se socialistët e Vlorës nuk do të bëhen pjesë e takimeve të Kokëdhimës dhe aq më tepër të mbështesin lëvizjen e tij të re për reformim. Kokëdhima braktiset edhe nga kreu i PS- së Vlorës, të cilin e mbështeti si kandidat për kryetar dhe e përshëndeti fitoren e tij.

Në një postim në Facebook, Anduel Tahiraj deklaron se strukturat drejtuese të Partisë Socialiste në Vlorë nuk janë bërë dhe nuk do të bëhen për asnjë moment pjesë e ndonjë takimi apo lëvizje të Koço Kokëdhimës, por vetëm me Ramën.

“Duke marrë shkas nga disa lëvizje të çrregullta të cilat ditët e fundit po bëhen në emër të socialistëve, dua t’u garantoj se strukturat drejtuese të Partisë Socialiste në Vlorë nuk janë bërë dhe nuk do të bëhen për asnjë moment pjesë e asnjë takimi apo lëvizje që dëmton angazhimet prioritare të përcaktuara nga kryesia e Partisë Socialiste dhe baza e saj. Këto lëvizje bëhen nga individë të caktuar dhe nuk përkojnë me orientimin e Partisë tonë”, thotë ai.

Kreu i PS së Vlorës, Anduel Tahiraj, ka theksuar se lëvizja e re e ish-deputetit nuk i shërben frymës së shëndoshjes, fuqizimit dhe bashkimit të mëtejshëm të të gjithë faktorëve dhe aktorëve.

“I denoncoj fort këto veprime të cilat nuk i shërbejnë frymës së shëndoshjes, fuqizimit dhe bashkimit të mëtejshëm të të gjithë faktorëve dhe aktorëve, duke synuar rritjen dhe forcimin tonë, për një fitore të thellë në Vlorë në zgjedhjet e vitit 2017”, tha ai.

Anduel Tahiraj mbyll reagimin e tij duke theksuar se çdo anëtar dhe simpatizant, që nga ata të viteve 1991 dhe deri te ai që është afruar sot me ne, të jemi të bashkuar për të korrur një fitore të thellë në zgjedhjet e ardhshme.

Duket se aventura e Kokëdhimës në PS mund të përfundojë më shpejt sec ai e kishte menduar. Tashmë, ish-deputeti duhet të gjejë një tjetër parti ku mund të shpalosë idetë e tij reformatore.