Dorëheqja e Briseidës/ Si po përplasen klanet Tahiri-Veliaj

24 Nëntor 2016, 19:19, Aktualitet CNA

Kur ministrja Milva Ekonomi deklaroi 10 ditë më parë se ?brandi? më i suksesshëm i vendit është Edi Rama, kishte vërtetë motive për të treguar besnikëri dhe bindje totale ndaj kreut të qeverisë.

Pozitat e ministres së Ekonomisë nuk ishin dhe aq të qarta në javët e fundit. Një luftë e ashpër për dominim po zhvillohej që prej ditës kur në ministri u emërua si zv/ministre zonja Briseida Shehaj.

Shehaj më herët kishte mbajtur pozicionin e Nr.1 të Tatimeve, por u largua prej atje kur Edi Rama vendosi ta zëvendësonte atë me zonjën Vasilika Vjero, e cila është dhe kushërirë e rrethit të dytë të kryeministrit.

Pasi u largua nga Tatimet, Shehaj dhe klani që e mbështet arriti të impononte postin e zv/ministres së Ekonomisë.

Por mbërritja e saj në ministri u komentua që ditën e parë nën zë, si një lëvizje provizore. Shehaj përhapi fjalë se qëndrimi i saj si zv/ministre do të ishte i përkohshëm pasi shumë shpejt do i zinte vendin ministres Milva Ekonomi.

Mes të dyjave nuk ka pasur marrëdhënie njerëzore dhe as kontakte institucionale. Shehaj në javët e fundit ka nxitur disa kontrolle/inspektime në radhët e punonjësve dhe të drejtorive, veprime që godisnin hapur njerëzit e emëruar nga Ekonomi.

Një sërë procedurash dhe dosjesh që presin të firmosen janë të bllokuara si pasojë e luftës së brendshme mes klaneve.

Kjo situatë është denoncuar në disa raste dhe pranë kryeministrit Rama, ndërsa ky i fundit e di mirë se çfarë fshihet realisht pas përplasjes Ekonomi-Shehaj.

Lufta mes klaneve ka bërë që kjo ministri të mos ketë një Sekretar të Përgjithshëm të emëruar në mënyrë të rregullt, por vetëm të komanduar. Për disa kohë u komandua zoti Ergys Qirici, i cili është denoncuar nga opozita si lidhje e afërt farefisnore e zonjës Shehaj.

Kjo e fundit gëzon mbështetjen politike dhe klanore të ministrit të Brendshëm Saimir Tahiri, ndërsa ministrja Milva Ekonomi gëzon të njëjtën mbështetje nga korridori Veliaj.

Madje ky i fundit njihet si një njeri që ?të mbaron punë me SMS? në ministrinë e Ekonomisë, pasi ka influencë të plotë mbi ministren.

Mediat kanë raportuar se Shehaj i ka dorëzuar kryeministrit një letër ku ka arsyetuar dorëheqjen e saj, por largimi i saj përflitet edhe si një?shkarkim i paketuar me dorëheqje?.

Tensionet dhe lufta e konjukturës Ekonomi-Shehaj, janë zgjatim i një lufte për influencë që ka nisur ndërkohë mes Erion Veliajt dhe Saimir Tahirit.

Luftë, që në rastin konkret, duket se është fituar nga Veliaj, pasi ndryshe nga sa pritej, nuk është Milva Ekonomi ajo që do të lëvizë si ministre, por ishte rivalja e saj, Briseida Shehaj ajo që u ?spastrua?. / Hashtag.al