E fundit!

09:24 Kronika

Pjesë e grupeve kriminale/ Pritet ekstradimi i 6 personave të kapur në Dubai

Pritet të ekstradohen sot, në Shqipëri, 6 shtetasit e kapu...

PD dhe pseudo-kandidatët/Nga Drilon Cani

2 Nëntor 2016, 11:07, Aktualitet CNA

Durrësi mund të konsiderohet pa frikë dega më e madhe e Partisë Demokratike në vend, meqë Tirana është ndarë në minidegë. Dhe si e tillë, dega e Durrësit meriton vëmendjen e drejtuesve të saj kryesorë.

Por nuk po ndodh kështu.

Ironia e fatit ka do kohë që e ndjek këtë degë.

Ne, që aderojmë këtu dhe kemi dhënë kontributin tonë disavjeçar, plot mund e djersë, po anashkalohemi në mënyrë të përsëritur. Sinjalet e para erdhën me përzgjedhjen e kandidatëve për kreun e Bashkisë së Durrësit. Në çdo grup-seksion u propozuan disa kandidatë dhe, nga propozimi ynë si strukturë, nuk u diskutua dhe as u përzgjodh ndonjë kandidat.

Në fakt, nuk ishte një problem i izoluar. Baza e PD-së në Durrës nuk u pyet fare. Derisa erdhi emri i kandidates Grida Duma, një emër i njohur, plot integritet dhe mjaft përfaqësuese e denjë, por që rezultoi figurë humbëse. Humbëse për shumë arsye. Për shkak të brendshëm, sepse qendra nuk e pyeti bazën, dhe për shkaqe të jashtme, si blerja votive, presioni ndaj votuesve, përfshirja e segmenteve kriminalë, shtimi artificial i listave të votuesve, falsifikimi i kartave te identitetit etj.

Megjithatë, pavarësisht se në bazën tonë mbërriti një kandidaturë nga qendra, e pakonsultuar me strukturat vendore partiake, përsëri ne vijuam fushatën në mënyrë të përgjegjshme, duke investuar jo vetëm në vlera monetare, por dhe me burime njerëzore e gjithçka tjetër për të arritur fitore në Durrësin e drejtuar nga kryebashkiaku i lodhur socialist, Vangjush Dako. Gjithçka rezultoi e kotë. Ne kapitulluam përballë makinerisë rilindase.

Pa u harruar ende ky kapitullim dhe pa mësuar ende nga gabimet e kryera, filluan të shfaqeshin problemet e para. Dhe ja ku erdhi lista e kandiatëve për Këshillin Bashkiak. Lëmsh. U desh ndërhyrja e Sekretarit të Përgjithshëm të PD-së për të vendosur pikat mbi ?i?. Në listë nuk kishte përfaqësim real të grup-seksioneve përkatëse që përbëjnë degën. Por, përsëri, edhe pse nuk u pyetëm dhe nuk u përfaqësuam siç duhej, vijuam betejën tonë për sukses dhe fitore.

Le t?i kthehemi argumentit kryesor, degës më të madhe të PD-së në vend. Si funksionon ajo?

Nuk funksionon aspak dhe është jashtë misionit të të bërit opozitë. Kjo është lehtësisht e dukeshme. Dhe po kaq lehtësisht e verifikueshme. Ata që ideuan shkrirjen e degës, sot po ideojnë të zgjedhin personin tyre në krye të degës, sepse u intereson deputetllëku më shumë se ardhja në pushtet. Nuk duan t?i shikojnë problemet në sy. Sot, problemi kryesor që kanë demokratët e ndershëm në Durrës është papunësia, por dhe mungesa frymës. Nuk ka frymë.

Në protestën e fundit që organizoi kreu i PD-së, Lulzim Basha, ne, demokratët e Durrësit dërguam drejt Tiranës 37 autobusë, pa llogaritur dhjetëra makina të vogla. A jemi sot në gjendje ne të organizohemi si më parë, për të shembur pushtetin e krimit? Kur dega nuk ka as kryetar dhe as kryesi?! Kur mungon fryma?

Absolutisht duhet të ndërhyjë kryetari Basha, i cili duhet t?i refuzojë materialet e kompozuara nga ata që merren vetëm me intriga dhe lojëra të pista, në kurriz të militantëve dhe mbështetesve të ndershëm të PD-së në Durrës.

Sepse ne mendojmë që, kreu i degës sonë duhet të jetë person me integritet; që ka dhënë prova si administrues i aftë; figurë e pastër e gjirit tonë dhe jo i ec e jak-eve të disave, që e kanë lënë në baltë partinë, jo një herë, në momentet e saj më të vështira.

Me shpresë dhe bindje që do të bëhet më e mira për ne, demokratët e Durrësit. /Citynews