web counter
LEXO PA REKLAMA!

SHKARKO APP

App Store
Google Play

Shënim/ Pseudo-beteja nacionaliste e Edi Ramës

2 Nëntor 2016, 10:50, Aktualitet CNA

Prej disa ditësh ka një debat midis Tiranës zyrtare, Athinës zyrtare dhe mediave greke, të cilat po bëjnë lojën e qeverisë Tsipras dhe kryeministrit Rama, të cilët po përdorin nacionalizmin për të tërhequr vëmëndjen nga problematikat reale që kanë qytetarët e tyre.

Retorika nacionaliste vjen si një konsum i brendshëm politik për të tërhequr vëmëndjen ndaj dështimeve që të dyja palët mund të kenë në vendet e tyre.

Edi Rama kërkon të tërheqë vëmëndjen nga kanabizimi i Shqipërisë, nga debati i fortë politik me aleatin kryesor në qeveri, nga çështjet e përfshirjes së policisë në trafikun e drogës, keqqeverisja e vendit, dalja e partisë së Blushit që mund ta dëmtojë jo pak e të tjera dështime së qeverisë.

Tsipras nga ana e tij është në kuotat më të ulëta historike në politikën greke. Aventura e tij politike, reformat dhe premtimet e pambajtura e kanë shtyrë liderin e ekstremit të majtë të nxisë frymë nacionaliste për të pasur përfitim të brendshëm politik.

Të dy po luajnë ping-pong me njëri-tjetrin për të tërhequr vëmëndjen nga problemet dhe për ta kaluar vëmëndjen tek debati i tyre nacionalist, ndërkohë emigrantët shqiptarë në Greqi vazhdojnë të jetojnë dhe punojnë me hallet e tyre, ashtu si edhe minoriteti grek në Shqipëri vazhdon si më parë. Pra ky debat nacionalist nuk i ka sjellë përfitime askujt, thjesht po përdoret që në zgjedhje palët të shtojnë votat në thesin e tyre.

Është thjesht debati shterpë i rradhës që Rama po e bën për të treguar se Shqipëria ka atë udhëheqës dhe jo Ilir Metën, i cili në Athinë, disa javë më parë, kishte qëndrime krejt të ndryshme nga kryeministri i vendit.

Rama me një gur vret dy zogj, por edhe Tsipras nuk mbetet pa gjë. /Citynews





Lajmet e fundit nga