E fundit!

12:47 Aktualitet

“Na falni se ju prishëm plazhin, por qytetarët po mbyten”/ Korreshi denoncon ndotjen në Lushnjë

Deputeti i Partisë Demokratike, Saimir Korreshi ka bërë nj...

Përse opozita hoqi dorë nga reforma elektorale?

18 Tetor 2016, 20:36, Aktualitet CNA

Nga Mero BAZE

Reforma elektorale nuk u mor asnjë ditë seriozisht nga partitë politike. Dy partitë e mëdha, Partia Socialiste dhe Partia Demokratike, duket se kërkojnë të ruajnë këtë statukuo të sistemit elektoral. Edhe LSI, dhe partitë e tjera të vogla që në fillim ishin kundërshtare të egra të këtij sistemi, deri në grevë urie, e kanë gjetur efiçent këtë sistem dhe nuk po kërkojnë reformimin e tij. E vetmja kërkesë ndryshe e LSI është ajo për lista të hapura, dhe i disa partive të vogla ajo për listë kombëtare, të cilat nuk shkojnë shumë larg këtij sistemi që kemi.

Po përse nuk po kërkohet një reformë e thellë elektorale përmes Kodit Zgjedhor?

Edi Rama ndoshta nuk dëshiron të prekë një sistem, të cilin e ka ndërtuar me kosto të lartë politike në bashkëpunim me Sali Berishën në vitin 2008. Nga shumë pikëpamje, ai është një sistem që i ruan atij autoritetin në parti, dhe e bën më të sigurtë fitoren e tij në zgjedhje, ndaj nuk ka ndonjë arsye të fortë për ta ndryshuar. I vetmi detyrim i tij moral, janë zgjedhjet e lira dhe të ndershme, të cilat janë gjithnjë të rrezikuara të ndoten edhe për shkak të defekteve të sistemit.

Por ajo që është e e pakuptueshme, është PD. Përse kjo opozitë nuk kërkon të ndryshojë dhe reformojë thellë sistemin elektoral?

Sistemi aktual me komisionerë politikë dhe pa numërim elektronik, është një ferr i vërtetë për opozitën. Përfytyroni ushtrinë e komisionerëve që i duhen opozitës, plus vëzhguesit e saj, të cilët duhen paguar ekstra dhe që janë një problem i brendshëm politik, financiar dhe elektoral i neveritshëm. Përfytyro pastaj paradën e orës së parë pas mbylljes së kutive kur të dalë Grida dhe Tabaku të thonë ?kemi fituar thellë?, ?i keni votat aty brenda? dhe të nesërmen të thonë nuk i njohim këto zgjedhje.

Nëse opozita do të kishte këmbëngulur së paku një vit më pare, dhe qeveria do ishte vënë më tepër para përgjegjësisë për të shkuar tek projekti i votimit elektronik, ose së paku i numërimit elektronik, që Shqipëria të shpëtojë nga saga e gjatë e numërimit të votave, nën presionin e fituesit të shpallur.

Opozita duhet të bënte betejë për këtë çështje prej më së një viti, që të mos kishte gojë tani qeveria të thoshte ?nuk kemi kohë për votim elektronik?.

Votimi elektronik i jep fund disa hallakve korruptive të zgjedhjeve, siç janë komisionerët batakçinj, dhe manipulimi gjatë numërimit, ku palët i shkelin syrin njëra- tjetrës dhe grijnë votat e partive të vogla, ose votat brenda koalicionit respektiv.

Lulzim Basha duhet ta bënte këtë betejë, pasi është beteja e tij e parë elektorale dhe ai duhet të shkonte sa më i sigurtë drejt saj.

E vërteta është se në zgjedhjet e vitit 2013, u bë një projekt pilot për votim elektronik në Tiranë, dhe numërim elektronik në Qarkun e Fierit, por të shtunën në mbrëmje, Sali Berisha ka telefonuar kompaninë spanjolle që kishte realizuar projektin, dhe kishte marrë dhe 3 milionë dollarë, dhe e urdhëroi të fikte kompjuterat dhe të arsyetohej se nuk e bënte dot.

Ende sot nuk është hetuar ky krim, dhe askush nuk ka mbajtur përgjegjësi për paratë e shpenzuara. Në konfidencë ata thonë se gjithçka ishte në rregull, por u tërhoqën nga urdhëri politik.

Për tre vite që kanë kaluar, Lulzim Basha e di shumë mirë, që po të bënte presion tek qeveria dhe tek faktori ndërkombëtar për këtë gjë, do t?ia kishte arritur. Beteja për votimin digital është një betejë më e drejtë, më morale dhe më frytdhënëse për opozitën, se sa beteja me ?qytetarin digital?, që harxhon kohë përditë.

Por Lulzim Basha çuditërisht nuk u mor me këtë betejë. I vetmi që i zuri ?gjuha lesh? për këtë gjë nga opozita, ka qenë Astrit Patozi, por duket që se mori njeri seriozisht.

I vetmi shpjegim që më vjen në mendje, përse Basha nuk kërkon një reformë të thellë elektorale, bazohet mbi së paku këto tre arsye.

E para, ai është ende lider në provë, dhe nëse ndryshon sistemi, atij i bie fuqia që duhet të ketë mbi listat në parti. Pra, reforma elektorale i heq atij shansin të marrë pushtetin brenda PD. Kam frikë se këto mesazhe ia çon dhe Rama me emisarët e përbashkët që kanë.

E dyta, është se ai nuk dëshiron të marrë përgjegjësi të ndryshojë një sistem që e ka bërë Sali Berisha, pa i dhënë ai leje ta bëjë këtë, siç i dha leje të kërkonte falje për importin e mbetjeve.

Dhe e treta, çfarë është dhe më e rëndësishmja, Lulzim Basha e do sistemin kështu siç është, me mundësi të mëdha ndotjeje, që të ketë çfarë të thotë kur të humbasë në vitin 2017, të flasë për blerje të votave apo manipulim, me qëllim që t?i shpëtojë ndëshkimit brenda partisë.

Janë të vetmet arsye perverse që po mbajnë peng reformimin e sistemit elektoral, për interesa personale të një njeriu, i cili ndryshe nga gjithë opozita, nuk mendon si të fitojë, po si të justifikojë humbjen.