web counter
LEXO PA REKLAMA!

SHKARKO APP

App Store
Google Play

E fundit!

x

Analiza/ Si kuptohet aludimi i Blushit me burgun e Metës?

8 Shtator 2016, 16:28, Aktualitet CNA

Në fund të fjalimit të tij të fortë në parlament, pasi i mëshoi edhe njëherë tezës se Rilindja ka hapur burgjet për fukarenjtë dhe ka nxjerrë prej tyre kriminelët e parlamentit, Blushi nuk ka heshtur edhe për një nga temat më përçarëse që ndan sot koalicionin e majtë. Atë që thuhet nën zë dhe jashtë kamerave: se një nga planet e Edi Ramës për ta hequr qafe vëllain e tij armik, është edhe eleminimi i Ilir Metës përmes burgosjes si i korruptuar.

Tashmë edhe Blushi e di se tentativat nga ana e Ramës nuk kanë munguar. Rama përdori ministrin Gjiknuri për të përhapur disa dokumenta të aferës DIA- CEZ që implikonin Metën me Kastriot Ismailin. Avokatët e qeverisë shqiptare hartuan raportin për ish kryeministrin e akuzuar për korrupsion. Por me letrat që kish në dorë Meta, i detyroi të tërhiqeshin edhe kryeministrin, edhe ministrin e Energjitikës.

Prova e dytë është përdorimi i ministrisë së Jashme për të hapur mesazhin se Meta është i korruptuar. Tashmë kryeparlamentari ka prova se diplomacia po punon për goditjen e tij, prandaj ka sponsorizuar disa artikuj në shtypin periferik perëndimor për të goditur ministrin Ditmir Bushati.

Që Meta vetë e di këtë lojë, e vërteton edhe fakti se ai, në atë fjalimin e famshëm para miratimit të reformës në drejtësi, ku argumentoi se nuk mund të ketë reformë reale duke kërcënuar me burg, e përdori në mënyrë të pandërgjegjshme plot 11 herë këtë fjalë.

Blushi, si një njeri i kësaj shumice, me siguri i di këto fakte të botës së nëndheshme të politikës. Ai e di gjithashtu edhe se nëse ka një pajtim dhe pakt të ri Rama- Meta, ai mund të bëhet vetëm mbi një bazë: premtimin për të mos e goditur njëri- tjetrin pas shpine. Pra jo përmes burgut.

Pikërisht këtë nënkupton edhe fraza e tij helmatisëse sot në parlament: ?Rama ka arritur të bindë edhe një njeri se nuk do ta fusë asnjeherë në burg: ky është Ilir Meta. Dhe kam përshtypjen se këtë premtim Edi Rama do ta mbajë me korrektesë”, ka thënë sot Blushi.

Por ai nuk ka harruar të shtojë edhe diçka tjetër. Të flasë për vlefshmërinë në kohë të këtij premtimi. Duke qenë një dëshmitar dhe njohës i historisë të së majtës, ku në fund Rama është i vetmi që ia ka futur gjithnjë Metës, edhe gjatë katharsisit në 2001, edhe në kongresin e 2003, edhe kur e përdori për ribashkimin e së majtës në 2006, edhe kur e flaku nga koalicioni dhe ndryshoi kushtetutën dhe ligjin zgjedhor në 2008, pra duke ditur të gjitha këto, Blushi ka shtuar me ironi se pakti i mosburgosjes është i vlefshëm: “Deri ditën kur Rilindja të hyjë në zgjedhje?. /Lapsi.al/





Lajmet e fundit nga