Bllokimi i pullave për librat, Federata e Sindikatës së Arsimit: Rrezikohet mospajisja ne kohë me libra, MAS penalizon qindra nxënës, nxjerr sajesa artificiale

20 Gusht 2016, 08:15, Aktualitet CNA

Bllokimin e pullave të çertifikimit për tekstet shkollore nga ana e Ministrisë së Arsimit e ka vlerësuar si shumë problematike dhe kryetari i Federatës së Sindikatave të Arsimit Xhafer Dobrushi në një prononcim për gazetën Sot.

?Nëse është e vërtetë kemi të bëjmë me një problematikë shumë serioze, e cila ndikon drejtpërdrejt në mbarëvajtjen e fillimit të vitit të ri shkollor. Zakonisht, vitet e kaluara shpërndarja e teksteve shkollore fillon në gusht dhe mos shpërndarja në kohë e librave, teksteve shkollore mund të krijojë kosto për nxënësit, veçanërisht ata nga rrethet. Pra, mund të kemi një situatë që ata mund të mos pajisen me tekste në kohë?, tha Xhafer Dobrushi.

Edhe pse normalisht, bazuar në praktikat e viteve të kaluara, shpërndarja tashmë duhej të kishte filluar prej javësh, diçka e tillë nuk ka ndodhur pasi shtëpitë botuese që kanë fituar të drejtën për të bërë shtypjen dhe shpërndarjen e librave nuk janë pajisur me pullat e certifikimit nga MAS. Pa këto pulla nuk mund të bëhet shpërndarja e teksteve dhe praktikisht gjithçka ka mbetur pezull.

Megjithë reagimet e përditshme nga ana e aktorëve të ndryshëm të ëprfshirë në këtë proces Ministria e Arsimit nuk jep asnjë informacion në lidhje me faktin e bllokimit të pullave për tekstet shkollore.

?Nuk kam asnjë informacion mbi tenderin që ka penguar shpërndarjen e pullave. Më duket si një pengesë artificiale, e cila besoj mund të ishte zgjidhur më mirë. Gjithsesi, mendoj se shpërndarja e teksteve duhet të fillojë sa më parë, pasi çdo ditë vonesë është në dëm të nxënësve. Natyrisht Federata e Sindikatave të Arsimit do të interesohet për këtë problematikë dhe do kërkojë që t?i jepet zgjidhje sa më parë?, ka theksuar Dobrushi.

Mosshpërndarja në kohë e teksteve shkollore për vitin e ri mund të sjellë pasoja të mëdha deri tek shtyrja e datës së fillimit të shkollës.

Në fakt Ministria e Arsimit ka ndjekur një metodë selektive duke iu dhënë pulla certifikimi vetëm dy shtëpive botuese që kanë raporte të afërta me të, ndërsa tek shtëpitë e tjera botuese nuk është shpërndarë asnjë pullë. Mendohet se gjithë kjo lojë e Ministrisë së Arsimit, në krye të së cilës qëndrojnë Lindita Nikolla dhe Plarent Ndreca, lidhet me kompaninë që fituese të tenderit për pullat e certifikimit. MAS synon që tenderin në fjalë ta fitojë një kompani afër saj dhe për këtë arsye tenderi ka mbetur peng deri tani duke bërë që të mos fillojë shpërndarja e teksteve shkollore në kohën e përcaktuar. Për çdo ditë vonesë në lidhje me këtë çështje pasojat do të bien mbi nxënësit, që do të mbesin pa libra. /Citynews.al