Mero Baze sulmon Bashen/ Për fajin tënd më shumë se 1 milion vota kundër

6 Gusht 2016, 21:57, Aktualitet CNA

E vetmja gjë që ka bërë me sukses Lulzim Basha, që në momentin kur ka marrë drejtimin e PD, është të dëshpërojë PD për zgjedhjet e radhës, apo për aksionin politik të radhës.

E filloi aksionin e tij politik duke injoruar reformën administrative dhe duke kërcënuar se PD nuk do ta njihte dhe nëse do të bëheshin zgjedhjet me atë reformë, ai nuk do hynte kurrë në zgjedhje. Në këto raste, del një ditë më pas dhe Paloka dhe thotë: ?Do t?i bëjmë thkrumb e hi kutitë?.

Pastaj vazhdoi kërcënimin për bojkot të zgjedhjeve edhe pas reformës deri dy muaj para zgjedhjeve. Kështu gjithë PD u shkreh, duke menduar se do fillonte opozita radikale me bojkote, dhe kur dy muaj para zgjedhjeve, ai ndryshoi vendim, pa dhënë asnjë sqarim, ndodhi ajo që ndodhi. PD humbi 45 me 16 dhe po të mos ishte Kaç Islami, që ta analizonte mirë këtë rezultat dhe ta ?provonte? fitoren, dëshpërimi do të ishte dhe më i madh.

Të njëjtën gjë bëri dhe me reformën në drejtësi. Në fillim e injoroi fare dhe tha se nuk do ta njohim kurrë.

Para një viti u përfshi në të nga presioni ndërkombëtar dhe kuptoi se rreziku nuk ishte kapja e drejtësisë nga Edi Rama, por kontrolli i saj nga Perëndimi. Kjo e alarmoi dhe e futi një spirale krize, duke shpresuar që përmes reformës në drejtësi të joshte LSI-në dhe të prodhonte krizë politike.

Në finale uli kokën, dhe për shkak të presionit brenda PD, nga kundërshtarët e vet, votoi reformën për drejtësi siç ia diktuan dhe i ngeli ëndërr në sirtar kriza politike dhe qeveria teknike.

Tani ka nisur përsëri të dëshpërojë PD, duke e deinkurajuar atë për zgjedhjet e ardhshme.

Ka filluar refrenin e bojkotit të zgjedhjeve, meqë nuk i dolën siç i kishte parashikuar pazaret me reformën për drejtësi.

Nuk është normale të trajtosh partinë më të madhe opozitare në vend, si një kompani private të cilën po deshe e fut në tender, po deshe nuk e fut. Opozita nuk është një institucion në funksion të frustimeve të kryetarit, por kryetari duhet të jetë në shërbim të saj. Kjo që ndodh me Lulzim Bashën, që gjithmonë para zgjedhjeve paralajmëron bojkot dhe pastaj hyn zvarrë në zgjedhje nga frika e kundërshtarëve brenda partisë, është mënyra më e keqe se si mund të drejtohet opozita.

Bojkoti i zgjedhjeve është një vendim i rëndë, që kur peshohet për t?u marrë, duhet të kesh popullin me vete, të përmbysësh vendin me revolucion. Kjo opozitë jo vetëm që nuk ka popullin me vete në këto spazma dëshpërimi, por nuk ka me vete as vetë PD-në. Kjo është e vetmja opozitë në histori që nga sondazhet del më keq se qeveria në perceptimin e opinionit publik. Askund në botë qytetarët nuk fajësojnë opozitën për ato që ndodhin. Vetëm opozita e Lulzim Bashës, ia ka arritur të jetë më e urryer se qeveria.

Por thellë thellë, dëshpërimi I Bashës dhe thirrja për bojkot, vjen pikërisht nga frika, se humbja e zgjedhjeve do ta përballë atë me kundërshtarët brenda partisë, dhe mendon se bojkoti është e vetmja zgjidhje që e shpëton.

Në vend që t?i japë kurajo opozitës, e t?i rrisë besimin se e mund këtë qeveri me çdo mjet dhe mënyrë, rri e vajton një vit para që ?këta do na mundin, por ne nuk hyjmë në zgjedhje?.

Tre vjet më parë, nëse ka pasur një pikë të fortë ish-opozita e majtë, kur hyri në zgjedhje, ishte kur injoroi fare KQZ duke tërhequr dhe anëtarët e vet, duke e lënë atë tërësisht në duar të PD, pa pyetur fare se mund të preknin zgjedhjet. Kur ke pas 1 milion vota, normal që bën si i fortë, por kur mendon se mund të kesh prapë kundër 1 milion vota, të paktën mos ndill zi para kohe, se mund të bëhen për fajin tënd më shumë se 1 milion vota kundër. Edhe pse shtiret si ?njeriu që qesh?, ky është i vetmi lider që e bëri PD-në të mos i qeshë buza kurrë. Dhe e gjitha kjo, nga frika që ka prej garës. Sëmundje që iu ngjit qysh ditën që u bë kryetar pa garë, në PD./TemA