Pizivengu Haxhinasto/Ministri i rrugëve që ka humbur rrugën

11 Korrik 2016, 14:20, Aktualitet CNA

Edmond Haxhinasto, aktualisht ministër i Transporteve, duket se ka një pozitë komode, në Qeverinë Rama, ashtu sikundër e kishte edhe në qeverinë e drejtuar nga Sali Berisha.

I vetmi ndryshim për të është dikasteri që mbulon, dikur ishte ministër i Ekonomisë dhe Energjitikës, sot është ministër i Transportit. Por si në qeverinë Berisha, ashtu edhe në kabinetin e Kryeministrit Edi Rama, Haxhinasto nuk ka lënë ndonjë gjurmë, ose më saktë nuk mund të mbhet mend për ndonjë punë të kryer.

Ajo që mund të kujtohet nga koha kur ishte ministër në qeverisjen Berisha ishte firmosja e një tenderi prej disa mijëra ton naftë, të cilin e fitoi një biznesmen me lidhje apo njohje me drejtuesit e koalicionit të majtë, sot në qeverisjen e vendit.

Ndërsa si ministër i Transporteve në Qeverinë Rama, Haxhinasto nuk mund të kujtohet për asnjë punë. Rrugën e Arbrit, për të cilën pati një premtim të Qeverisë Rama në 2013, edhe sot e kësaj dite nuk ka asnjë projekt, ndërsa dikasteri që drejton Haxhinasto, nuk është në gjendje ti japë një përgjigje sot gjithkujt që është i interesuar për këtë projekt.

Po kështu, Haxhinasto përgjatë 3 viteve në krye të Ministrisë së Transporteve, mund të kujtohet për palmat e mbjella në rrugën drejt aeroportit Nënë Tereza, apo kufizimin e shpejtësisë në këtë aks rrugor, duke vendosur tabela që lejon shpejtësi në 60 km/orë, njëlloj sikundër në rrugë normale.

Haxhinasto mund të kujtohet për debatet që krijoi me shërbimin e transportit ndërqytetas, apo për papërgjeshmërinë e treguar kur në akset kombëtare kryheshin ndërhyrje, të cilat rezultonin fatale në aksidentet rrugore, si në rastin e dy fëmijëve që humbën jetën në një aksident rrugor, sepse ishte favorizuar një karburant që i përket babait të njërit prej bashkëpunëtorëve të afërt të ministrit të Transporteve. Por për aksidentet e ndodhura, ministria që drejtohet nga Haxhinasto ia ka kaluar përgjegjësinë policisë, edhe pse Autoriteti Rrugor është nën varësinë e dikasterit të Transporteve.

Pra nëse do të bëhet një bilanc mbi punët e bëra nga ministri i Transporteve, qoftë në qeverinë Berisha ashtu edhe në kabinetin Rama, vështirë se mund të gjesh apo evidentosh punë të realizuara nga Haxhinasto. Nëse ndryshimet në qeveri do të bazoheshin mbi performacën e ministrave, ndoshta ministri aktual i Transporteve, do të ishte në krye të listës për t?u larguar. Ndoshta edhe kjo mund të ndodhë, nëse Rama vendos ndryshimet referuar edhe kushteve të partnerit të tij në qeverisjen e vendit, ku Edmond Haxhinasto është në listën e ministrave që duhen larguar, edhe nga forca politike që ai përfaqëson. /citynews/