Zhvillimet/A po zëvëndëson Irfani, Koçon?

11 Korrik 2016, 12:15, Aktualitet CNA

Divorci politik mes Koço Kokëdhimës dhe Edi Ramës, duket se po shoqërohet edhe me një afrim të Irfanit me linjën e Kryeministrit. E ndërsa Kokëdhima duket se ka zgjedhur si aleat të tijin, Kryetarin e LSI-së, Ilir Meta, për të barazpeshuar këtë lëvizje, Edi Rama duket se ka menduar ofrimin e Irfanit.

Këtij të fundit në mbledhjen e fundit të Këshillit Bashkiak, iu dha me qira një sipërfaqe prej 10 mijë metrash katrorë, ku sipas projektit do të ndërtohet një markatë. Prona, një pjesë e së cilës ishte private, iu dha një prej kompanive që ka në pronësi Irfani, i cili në dallim nga Koço, duket se ka deri diku edhe konsensusin e opozitës.

Ndoshta kjo mund të jetë një nga arsyet sepse Rama mund të ketë ofruar Irfanin dhe të ketë spostuar Koçon, i cili mund të jetë një nga deputetët më të akuzuar nga opozita, përsa kohë ishte në sallën e Kuvendit me mandatin e ligjvënësit. Votimi i fundit në këshillin bashkiak, tregoi se Irfani ka ende ndikim tek rradhët e opozitës, përsa kohë këshilltarët e saj, në momentin e votimit të projekt-vendimit, zgjodhën më mirë të bënin pushim, sesa të mbronin, bie fjala, interesat e pronarëve të ligjshëm.

Nëse do të kthejmë në kujtesë përplasjet mes policisë bashkiake dhe asaj të rendit për një semafor të vendosur pranë një kompleksi të ndërtuar nga Irfani, do të kujtojmë se dy vite më parë ai ishte më i afërt me ish-kryetarin e Bashkisë së Tiranës në vitin 2014, sesa me Qeverinë. Bashkia e Tiranës i kishte dhënë të drejtën për vendosjen e semaforit, por policia e rendit e kundërshtonte. Dy dikasteret u vunë në përballje mes tyre, ndërsa Irfani ia arriti të vendoste semaforët.

Përballë zhvillimeve të reja, kur grupi mediatik i Koços mund të nisë sulmet mediatike ndaj Qeverisë apo Kryeministrit, ky i fundit ndoshta ka menduar të kenë në aleancë një tjetër grup mediatik.

Por, Irfani me raportet e reja të krijuara, mund t?i ofrohet edhe një opsion, të kandidojë për deputet nën siglat e PS-së në zonën e Skraparit, pikërisht atje ku LSI pretendon se ka një hambar votash dhe që i garanton partisë së drejtuar nga Meta, një deputet.