Britania jashtë BE/ Komunistët: Perandoria Europiane drejt fundit, e korruptuar dhe e sunduar nga Gjermania

26 Qershor 2016, 06:47, Aktualitet CNA

Komunistët reagojnë pas daljes së Anglisë nga Bashkimi Europian, vendim i cili ka bërë bujë dhe ka tronditur tregjet evropiane. Sekretari i Komitetit Qendror të Partisë Komuniste të Shqipërisë, Gjon Bruçi, në një intervistë për gazetën “Sot” jep alarmin se Perandorisë Europiane po i vjen fundi, pasi Bashkimi Europian është i korruptuar dhe i sunduar nga Gjermania, ndërsa shtoi se ka shfrytëzuar me vite varfërinë e vendeve në zhvillim.

?Bashkimi Europian është një perandori si gjithë perandoritë e kaluara, me ndryshimin se është më moderne se ato në formë. Si çdo perandori, ajo ka një fillim, një pikë kulminante dhe një zbritje gjer në falimentim. Kohët sot evolojnë shumë shpejt, ndaj dhe fundi perandorisë europiane po i vjen pa arritur ?Kulmin?. Dalja e Britanisë nga ky komunitet, tregon se ka filluar tatëpjeta e kësaj perandorie, e cila nuk do të vonojë të shembet komplet. Do të shembet sepse si çdo perandori është ngritur mbi themele të padrejta, themele që synojnë shfrytëzimin e popujve dhe vendeve të varfëra e në zhvillim?, thotë Bruçi. Ai tha se dalja e Anglisë nga BE, dëshmon krizën në këtë organizim.

?Sipas pikëpamjes time, Shqipëria ka qenë dhe mbetet në Europë, por nuk ka qenë, nuk është dhe nuk duhet të jetë në institucionin politik dhe ekonomik me emërtimin BE. Aq më pak të shkojë në këtë institucion e ndarë në copa, siç pretendojnë liderët tanë politikë, vasalë të Brukselit. Më së pari duhet të ndodhë integrimi shqiptar, sipas parimit ?Një komb një shtet? dhe pastaj integrimi europian. Dhe kur them ?integrim europian? kam parasysh integrimin në fushat e zhvillimit, të shkencës e të kulturës, por jo në institucione politike, të cilët denigrojnë shumë shpejt në zgjedha mbi popujt e vendet e vegjël. Bashkimin e popujve nuk mund ta bëjnë kurrsesi politikanët që përfaqësojnë një sistem që është burim i luftërave midis popujve. Vëllazërimin e popujve do të bëjnë proletarët (klasa punëtore e mbështetur nga klasat e shtresat progresive të shoqërisë) me Partinë Komuniste kur të arrijnë fitoren e pashmangshme të Komunizmit, sistemi i vërtetë i shoqërisë njerëzore?, thotë Bruçi.

Kreu i Partisë Komuniste 8 Nëntori, Preng Çuni, thekson se sistemi kapitalist nuk ka natyrë humane krahasuar me atë komunist, dhe se dështimi total do të jetë i afërt. Ai tha se administrata e BE është e korruptuar dhe ka zhytur në borxhe shtetet e tjera.

?Lidhur me pyetjen që shtrohet se cili sistem është më i suksesshëm, kapitalizmi apo sistemi i kaluar, i cili në mënyrë djallëzore apo spekulative etiketohet si komunist, unë po preferoj të citoj Papa Gjon Palin, i cili thoshte “sistemi komunist i Lindjes i imponoi sistemit kapitalist natyrën humane” dhe se “sistemi komunist posedon thelbin e së vërtetës?, thotë Çuni.

Ai ka përgëzuar daljen e Anglisë nga BE, duke shtuar se ajo e kuptoi qartë administratën burokratike të BE.

?Politika e vjetër britanike nuk do suportonte kurrë ndjenjën e inferioritetit aq më pak ndaj “dy rivalëve” të hershëm, Franca dhe Gjermania dhe sigurisht në sistemin kapitalist ku dominon tregu, ajo ka interesat e saj për hapësira ekonomike. Politika britanike nuk mund të jetë si qeveritarët e shteteve të varfra, të cilat mbijetojnë nën “çadrën” e të mëdhenjve. BE me administratën e saj ka kompromentuar e korruptuar mjaft nga qeveritë e disa shteteve, të cilat nëpërmjet mekanizmave financiare të Bankës Europiane i kanë zhytur në borxhe, duke ua “blerë” lirë sovranitetin kombëtar, këtu hyjmë edhe ne pavarësisht se Shqipëria nuk është anëtare e saj?, thotë Çuni.