Kosovë: 42 vjet burg për shtatë të akuzuar për vepra që lidhen me terrorizmin

21 Maj 2016, 05:50, Aktualitet CNA

Një gjykatë në Ferizaj, rreth 40 kilometra në lindje të Prishtinës, shpalli fajtorë dhe dënoi me nga tre deri në dhjetë vjet heqje lirie, shtatë shqiptarë të Kosovës të akuzuar për përfshirje në veprat që lidhen me terrorizmin.

Gjykata e shpalli fajtor imamin Zeqirja Qazimi për veprat penale të rekrutimit për terrorizëm dhe nxitje të urrejtjes, përçarjes ose mos durimit kombëtar, racor, fetar apo etnik dhe e dënoi me dhjetë vjet heqje lirie.

Gjashtë persona të tjerë u dënuan me nga tre deri në tetë vjet heqje lirie për veprat peanle rekrutim për terrorizëm, organizim dhe pjesëmarrje në grup terrorist dhe për veprën penale armëmbajtje pa leje.

Zeqirja Qazimi, Ilir Berisha, Sadat Topojani, Burim Ballazhi dhe Jetmir Kyqyku, pjesë e grupit të dënuar sot akuzohen se u kanë bërë thirrje personave të tjerë për të kryer ose për të marrë pjesë në kryerjen e veprave terroriste, të marrin pjesë në aktivitetet e grupit terrorist dhe të sigurojnë fonde dhe burime materiale.

Ndërsa Ilir Berisha, Sadat Topojani, Burim Balazhi, Liridon Kabashi dhe Ilir Krraba, kanë marrë pjesë në veprimtarinë e grupit terrorist, në atë mënyrë që paraprakisht janë pajtuar që të shkojnë në luftë në Siri dhe t?i bashkohen grupit të shqiptarëve që kanë luftuar në anën e organizatës terroriste ?ISIS?.

Akuza e ngarkon Zeqirja Qazimin, se duke e keqpërdorur pozitën e tij si Imam në xhaminë ?El-Kuddus? në Gjilan, publikisht ka nxitur dhe përhapur urrejtje, përçarje dhe mos durim midis grupeve kombëtare, racore, fetare, etnike dhe grupeve tjera që jetojnë në Kosovë.

Kosova është përballur që në vitin 2012 me rastet e para të shkuarjes së qytetarëve të saj në Siri. Që atëherë rreth 300 qytetarë të Kosovës i janë bashkuar konfliktit atje ndërsa aktualisht sipas vlerësimeve të organeve të sigurisë numri sillet në rreth 60 sish. Mbi 60 prej tyre janë të deklaruar të vdekur.

Që nga viti 2013, autoritetet në Kosovë kanë hetuar mbi 180 persona të përfshirë në vepra që lidhen me terrorizmin. Rreth 90 persona janë arrestuar dhe janë ngritur mbi 40 aktakuza./VOA