E fundit!

17:00 Aktualitet

SPAK dha pretencën për fraksionin e dosjes “Meta”/ Ish-presidenti reagon nga burgu

Ish-presidenti Ilir Meta ka ndarë qëndrimin e tij pas pret...

Unioni i Gazetarëve: Të përmbysim realitetin me liri të pjesshme shtypi!

27 Prill 2016, 17:42, Aktualitet CNA

Unioni i gazetarëve Shqiptarë ka reaguar lidhur me raportin e Organizatës Freedom House, ku vendi ynë renditej i parafundit në rajon. Në deklaratën për mediat, Unioni i Gazetarëve Shqiptarë vlerëson seriozisht shqetësimet dhe problematikat që lidhen me gjendjen faktike të lirisë së shtypit dhe mediave në Shqipëri.

Deklarata e plotë

Unioni i Gazetarëve Shqiptarë vlerëson seriozisht shqetësimet dhe problematikat që lidhen me gjendjen faktike të lirisë së shtypit dhe mediave në Shqipëri, të konstatuara përmes raportit periodik të organizatës prestigjioze Freedom House. Në këtë raport vendi ynë, në kuadër të indeksimit global, renditet në pozicionin e 106-të me 51 pikë.
Kjo është rënia më e ndjeshme e pesë viteve të fundit dhe zbritje e theksuar në krahasimin me gjendjen e shtypit në rajonin e Europës Juglindore.
Unioni i Gazetarëve Shqiptarë konfirmon shqetësimet dhe këtë situatë kritike të lirisë së shtypit dhe vektorëve themelorë që përcaktojnë atë si dhe apelon për një reagim të të gjithë aktorëve mediatikë në vend për të dalë nga kjo situatë e krijuar. Organizata jonë apelon pranë çdo pjestari të komunitetit të gazetarëve si dhe tek gjithë aktorët mediatikë në vend të vlerësojnë seriozisht nevojën për përmirësim të cilësisë së lirisë, duke u dhënë prioritet lirisë vetiake, pavarësisë profesionale në raportim si dhe respektimit të kurajos për raportim përmes fakteve, dokumentave dhe këmbënguljes kërkuese e investiguese kundër korrupsionit dhe në mbrojtje të të gjitha vlerave të demokracisë dhe ndërgjegjes morale.
Unioni I Gazetarëve Shqiptarë shpreh bindjen se bashkimi i gjithë gazetarëve në iniciativat kundër informalitetit në media, në luftën kundër kapësve dhe përdoruesve të mediave për llogari dhe interesa të ngushta mitmarrëse dhe mitdhënëse si dhe beteja e munguar për themelimin e medias publike në këtë vend, janë aksione që e nxjerrin Shqipërinë nga lista e vendeve me shtyp pjesërisht të lirë dhe rikthejnë besimin e humbur ndaj pushtetit të medias në këtë vend.
UGSH ka bindjen se këtë realitet dhe përmbysjen e tij e kanë në dorë vetëm gazetarët. Mos presim nga askush tjetër!