E fundit!

07:35 Ekonomi

Pas vizave e “braktisën”, këtë vit turistët nga Kosova i rikthehen sërish Shqipërisë

Shqipëria vazhdon të mbetet destinacioni kryesor i pushues...

Zv/Drejtori i Policisë pret delegacionin e Zyrës Federale zviceriane

8 Prill 2016, 19:56, Aktualitet CNA

Zv/Drejtori i Policisë së Shtetit, Rebani Jaupi, priti sot në një takim një delegacion të Zyrës Federale të Policisë së Zvicrës, i kryesuar nga zj. Nikoleta Della Valle, Drejtoreshë e Zyrës Federale të Policisë së Zvicrës. Në këtë takim i pranishëm ishte edhe Ambasadori i Zvicrës në Shqipëri, Z.Christoph Graf. Në qendër të bisedës së zhvilluar ishte bashkëpunimi dhe shkëmbimi i informacionit mes strukturave përkatëse policore.

Drejtuesit e lartë policorë të të dy vendeve evidentuan nivelin shumë të mirë të bashkëpunimit ndërmjet Policisë Shqiptare dhe Policisë Zviceriane në luftën kundër krimit të organizuar, narkotikëve e trafiqeve, kjo në kuadër edhe të marrëveshjes ekzistuese në fushën e bashkëpunimit policor mes dy vendeve.

Njëherazi u evidentuan edhe çështje në interes dypalësh, ku ky bashkëpunim dhe shkëmbimi i informacionit do të intensifikohen edhe më tej, si në fushën e falsifikimit të parave, krimit kibernetik dhe terrorizmit.

Gjatë këtij takimi Zv/Drejtori i Policisë së Shtetit bëri një ekspoze të masave të marra nga Policia e Shtetit dhe rezultateve të arritura në luftën kundër krimit të organizuar dhe trafiqeve, si dhe të strukturës së veçantë të ngritur në Policinë e Shtetit për tu përballur me çështjet e terrorizmit dhe radikalizimit dhe bashkëpunimit të kësaj strukture me agjencitë e tjera ligjzbatuese brenda dhe jashtë vendit.

Po ashtu Z. Jaupi evidentoi edhe masat e marra për kontrollin kufitar në kuadër të flukseve të refugjatëve, që kanë përfshirë vendet e rajonit dhe më gjerë, ku në këtë kontekst u evidentua edhe bashkëpunimi i ngushtë me partnerët ndërkombëtar, në mënyrë të veçantë me Guardia di Finanza.

Ndërkohë nga Drejtoresha e Zyrës Federale të Policisë së Zvicrës u vu në dukje bashkëpunimi shumë i mirë me Policinë Shqiptare në kuadër të luftës kundër krimit të organizuar, si dhe u evidentuan nismat e ndërmarra nga Policia e Zvicrës për mbështetjen e bashkëpunimit policor mes vendeve të rajonit, ku në këtë kuadër po mbështetet edhe integrimi i Kosovës në organizmat policore rajonale dhe më gjerë.

Në përfundim të takimit Zv/Drejtori i Policisë së Shtetit dhe Drejtoresha e Zyrës Federale të Policisë së Zvicrës, duke nënvizuar rëndësinë e bashkëpunimit mes agjencive ligjzbatuese për një luftë të suksesshme ndaj krimit në përgjithësi dhe krimit të organizuar në mënyrë të veçantë, shprehën gatishmërinë e përbashkët për të rritur edhe më tej nivelin e bashkëpunimit dhe shkëmbimit të informacionit mes policive të të dy vendeve.