Reforma në Drejtësi/ Juristët: PS-PD kanë gjetur konsensusin për ta bllokuar

27 Mars 2016, 07:27, Aktualitet CNA

Reforma në drejtësi është ndoshta më e rëndësishmja në këto vite të demokracisë. Atëherë kur u duk se palët kishin gjetur dakordësinë për të votuar këtë reformë, bisedimet u bllokuan.

Juristët deklarojnë se dy subjektet e mëdha politike, PS-PD, kanë arritur konsensusin mes tyre për ta bllokuar reformën në drejtësi, pasi nuk kanë vullnet politik për ta miratuar atë. Juristi Sokol Hazizaj, në një prononcim për gazetën ?Sot?, sjell dy momente ku duket se PD dhe PS po e bllokojnë reformën në drejtësi. Hazizaj tha se reforma në drejtësia është kërkuar nga SHBA dhe BE, dhe dy forcat politike janë të detyruara që ta pranojnë, ndërsa ekspertët e Komisionit për Reformën në Drejtësi dështuan me draftin.

?Midis dy forcave të mëdha politike nuk ka vullnet politik për ta kaluar reformën në drejtësi. Janë dy momente: Së pari, nuk e kanë kuptuar se reforma në drejtësi nuk është opinion i tyre, por i ndërkombëtarëve dhe qytetarëve shqiptarë. Së dyti, për të treguar se nuk kanë dakordësi mes tyre është mënyra se si ka funksionuar komisioni i ekspertëve. Nuk janë parashikuar ndryshimet procedurale ato çka i mundësojnë qytetarëve realizimin e reformës në drejtësi?, u shpreh Hazizaj. Juristi Hazizaj thotë se PD-PS po përdorin njëra-tjetrën për ta bllokuar reformën, ndërsa ndryshimet kushtetuese që kanë bërë forcat politike i ka krahasuar me ato të 2008.

?Beteja politike që po bëhet për reformën në drejtësi, nuk ka lidhje fare me atë që çfarë kërkon drejtësia dhe çfarë duhet riparuar në drejtësi. Partitë politike po e përdorin thjesht për të rrëzuar njëra-tjetrën, po e përdorin për debat politik dhe gjueti, ndryshe nga ajo çfarë duhet të manifestojnë ato në ndryshimet themelore të zhvillimit të shoqërisë shqiptare siç është Kushtetuta. Këto janë thjesht ndryshime si në 2008?, u shpreh Hazizaj.

Edhe avokati Sajmir Vishaj është shprehur se PD dhe PS thjesht nuk kanë dëshirë ta miratojnë draftin për reformën në drejtësi. ?Nuk kanë dëshirë ta miratojnë?, tha Vishaj.

Reforma në Drejtësi po kërkohet me ngulm nga ndërkombëtarët si kushti kryesor për të përparuar drejt Bashkimit Europian. Politika në vend nuk e ka gjetur ende gjuhën e përbashkët të konsensusit për të miratuar Reformën në Drejtësi.