Përse Basha u prit “pa dëshmitarë” nga zonja Nuland?/ Nga Mero Baze

17 Mars 2016, 19:27, Aktualitet CNA

Ndërsa Lulzim Basha u nis drejt Uashingtonit në një udhëtim pune informues për opozitën shqiptare, kryetari ?de facto? i Partisë Demokratike, Sali Berisha, tentoi të diktojë axhendën e bisedimeve të tij me zyrtarët amerikanë, duke kërkuar shtyrjen e reformës në drejtësi pas zgjedhjeve.

Duke marrë shkas nga një lloj qëndrimi shantazhues i Partisë Socialiste, që përkufizohet ?ose reformë, ose zgjedhje?, shprehur fillimisht nga Majko dhe vazhduar nga Braçe e Balla, fillloi një keqpërdorim i skenarit të zgjedhjeve, duke tentuar të shtyhej reforma.

Në fakt, socialistët kur i referohen shantazhit për zgjedhje të reja, kanë parasysh se mund të arrijnë shumicë kushtetuese bashkë me Metën. Deklarata e Ballës për 1 milion e 100 mijë shuplaka, nënkupton 95 mandate në Kuvend. Pra, nuk është shantazh për ndarje nga LSI, siç përpiqet të bëjë Berisha diversion, por shantazh për një shumicë kushtetuese pas zgjedhjeve.

Në funksion të axhendës së shtyrjes së reformës pas zgjedhjeve, Basha u detyrua ta fillojë udhëtimin e tij në SHBA, duke kaluar ditën e parë nga zyra e Podestës, duke paguar kontratën financiare për t?i siguruar takimet në Uashington.

Por takimet e sotme në Uashington dhe sidomos takimi me ndihmës zëvënds-sekretaren për Evropën, Viktoria Nuland, e ka detyruar atë të tërhiqet nga skema e cila Berisha tentoi të diktojë në axhendën e tij në Uashington. Mes shantazhit socialist ?reformë, ose zgjedhje?, dhe shantazhit të Berishës, ?zgjedhje, pastaj reformë?, Basha është detyruar të pranojë qëndrimin alla Zhvejk, se duhet bërë ?edhe reforma, edhe zgjedhjet?. Një njeri në hall s?ka si flet ndryshe.

Por, ajo që bie në sy në takimin me zonjën Nuland, është fakti se Basha nuk ka mundur të marrë dot me vete Fatmir Mediun, dhe për shkak të tij, asnjë prej anëtarëve të delegacionit, duke ja vështirësuar ndjeshëm tashmë shpjegimin e tij, se çfarë i ka sugjeruar zyrtarja e lartë amerikane.

Takimi është zhvilluar pa dëshmitarët që Berisha i dha me vete, dhe pa Mediun, duke e lënë në dorë të Bashës të interpretojë atë mesazh politik që mori.

Nga komunikimi publik, duket se është detyruar të flasë për nevojën e ?reformës para zgjedhjeve?, çka është dështim i axhendës për shtyrje të ?reformës pas zgjedhjeve?, siç vazhdon të pretendojë Berisha. Por, deri në Tiranë ai ka kohë të mendohet, dhe si zakonisht, këtu të tundë kokën dhe të pranojë që në Uashington i thanë, ?ato që thotë Berisha?. Fundja deri herën tjetër që mund të shkojë para zgjedhjeve të tjera, dhe mund ta harrojnë.