Shokë drejtues opozitarë, bëhuni zotërinj!

5 Mars 2016, 20:04, Blog CNA

Sokol Gjoni

Asionet në rënie të opozitës janë një tregues i pafuqishmërisë opozitbërëse të drejtuesve të degës së PD-së Pukë, të cilët ende nuk po kuptojnë përgjegjësinë që kanë në raport me qytetarët dhe shoqërinë në tërësi. Nuk besoj se gjithçka shkon mirë në administrimin publik sa të mos pipëtijë asnjë zë opozitari !!! Atëherë, shtrohet pyetja; Çfarë nuk shkon në frontin opozitar? Përtej këndvështrimit personal, parashtrimet e mia janë një qasje racionale, analitike dhe parimore në funksion të rikthimit të vlerave identitare dhe afishimit të strategjive dobiprurëse.

Së pari, mendoj se duhet ndryshuar mendësia e të bërit opozitë, pasi të qenurit sporadik, me deklarata plot patetizëm, pa konkludime të dobishme, më ngjasojnë më shumë me tendencën për të jusfifikuar televizisht anëtarësinë dhe opinionin qytetar, se sa një realitet opozitarist. Opozitarizmin, falë keqadministrimit publik që u bëhet sektorëve prioritarë të zhvillimit ekonomiko-social, e ndjejmë në çdo arterie të shoqërisë. Qytetarët bisedojnë dhe flasin nëpër kafene, në rrjete sociale, në ballafaqime të ndryshme, duke konfrontuar realitetin me pritshmëritë, pra ka skajshmërisht opozitë dhe opozitarizëm qytetar. Po opozita politike, e cila është mandatuar nga qytetarët për të qenë përfaqësuese e mendimit ndryshe, e mendimit që inspiron shpresë, ndryshueshmëri, aspiratë, ku është ? Ajo që më bën më shumë përshtypje është pajtueshmëria e drejtuesve me mungesën e opozitbërjes, çka më intrigon në perceptimin tim për strategjitë vijuese, të cilat janë një telajo e shpëlarë e degdisjes së PD-së në një koleksionim individësh pa nerv opozite. Së dyti, takimet që bëhen me forumet e partisë(kryesia) të jenë më produktive, më konkrete, me synime dhe detyra të qarta, larg artikulimeve mllefosëse. Sensi opozitarist është dimension dhe retorikë më e gjerë se sa strukturizimi partiak, prandaj, duhet koordinim me grupe të interesit dhe me çdo qytetar si një ofertë parapërgatitëse për përballjen zgjedhore të radhës. Së treti, duhet përmirësuar klima e raporteve të PD-së me qytetarët! Shohim që kemi një braktisje nga qytetarët, e cila vjen për shkaqe të pa analizuara(por të njohura) dhe kjo është tregues i afirmimit të një potenciali me kredenciale të pamjaftueshme reputative. Strukturat të motivohen, të angazhohen, si dhe të përgatiten strukturalisht në përgjegjësitë e tyre, pa mënjanuar vlerat dhe kontributet historike të partisë. Së fundmi, inefiçienca e strukturave nuk duhet kurrsesi të maskohet me struktura fiktive. Kam parasysh këtu, takimet e kryesisë, të cilat shpeshherë janë butaforike, të mbushura me pompozitetin e paradave me makina të shtrenjta dhe aksesorë të tjerë luksoz të ca ish-ëve, të cilët më shumë përfaqësojnë anë të errëta të të djeshmes, se sa frymëzime iluminuese për të nesërmen. Strukturat nuk janë numerike, ata janë përfaqësuese dhe nëse sistemi përfaqësues pati probleme të mëdha, kjo nuk do të thotë se e tillë është doktrina që aspirojmë.