Kronikë e një "divorci" të paralajmëruar

4 Mars 2016, 15:36, Blog CNA

Sokol Gjoni
Që koalicioni PS-LSI ishte ngjizur në brumatriçen e interesave të pushtetit politik dhe të fijeve ekonomiko-kriminale nuk linte asnjë dyshim, por që të degdisej në këtë derexhe raporti mes tyre në një hark kohor prej dy vitesh, ishte pothuajse e paparashikuar…!!! Në zgjedhjet e 21 qershorit 2015, ku pati një demonstrim teatral muskujsh mes këtyre forcave politike, u vërejt dukshëm mes tyre fenomeni i të bërit fushatë secili “për hesap të vet”. I stisur për të qeverisur vendin (në emër të reformave të mëdha), ky koalicion nuk po i reziston makutërisë që prodhon bollshmëria e megapushtetit që kanë, ku së fundmi, me tiparin karakterizues të tij, po shtrin tentakula të qarta drejt “territoreve” të aleatit që e mban në këmbë. Që ky koalicion, në nivel vendor është paputhshmërisht jo funksional, e tregon mungesa e kohezionit programor, mos respektimi i parimeve të bashkëqeverisjes dhe të reciprocitetit solidar në aksione politike, por mbi të gjitha e tregon sjellja prepotente e forcës më të madhe politike, e cila rolin saj paternal e ushtron makutshëm dhe papërfillshëm me aleatin kryesor, i cili në rastin më të keq nuk është dosido…
Zhviilimet e fundit brenda koalicionit rilindist-LSIst këtu në Pukë, me sfond “larje hesapesh” për hesap të pazareve të reja mes protagonistëve të të njëjtit drejtim të (s)duhur, është flakadan i hedhur në amullinë e këtij koalicioni duke paralajmëruar natyrshëm prishjen e asaj që u ngjiz denatyrshëm. Stërkëmbëzat ndaj aleatit mbakëmbëz, përveçse cinizëm që prodhohet nga një mjedis oriental politikbërjeje, janë manifest i doktrinës bajraktariste që karakterizon individë që stolisen me petkun e të qenurit të zgjedhur. Shkarkimi nga këshilli i bashkisë Pukë i zj. Sajmira Laçi si anëtare në këshillin e qarkut Shkoder, (kujtojmë se këshilli i bashkisë Pukë është në shumicë dërrmuese numerike i majtë dhe se zj. Sajmira Laçi është kryetare e degës Pukë të LSI) është lëvizje që kundërmon aromë pazaresh dhe intrigash në funksion të kontrollit mbi këshillin e bashkisë Pukë. Se kush kërkon ta kapë këshillin e bashkisë, mjafton të përmendim disa aspekte dhe aty do të kuptojmë regjisorin e kësaj manovre. Si ka mundësi, që në asnjë nga mbledhjet e zhvilluara deri më tani, nuk është lejuar Puka TV të pasqyrojë asnjë kronikë nga këto takime? Pse qytetarët nuk informohen, dhe më keq biles, as nuk lejohen të hyjnë në këto takime? Pse gjithë ky terr informativ dhe kujt i intereson mosinformimi i publikut? Për shumë e shumë pyetje të kësaj natyre, padyshim që ka një përgjigje dhe ka një autor. Tani sytë i kemi nga… dekriminalizimi!!!