E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

Rrezatimi jojonizues, rrezik serioz për shendetin!

18 Shkurt 2016, 17:02, Aktualitet CNA

Ky është konkluzioni që shumë studiues kanë nxjerrë pas shumë studimesh dhe provash laboratorike. Ata shprehen se rrezatimi jojonizues nuk ka rrezikshmërinë e rrezatimit jonizues (i frekuencave të larta dhe me energji të madhe). Por edhe ky rrezatim ka efekte negative në organizmin e njeriut nëse është mbi vlerat e caktuara. Në rrezatimin jojonizues është e pranishme si fusha magnetike, ashtu dhe fusha elektrike, secila me efekte specifike të mundshme biologjike. Rrezatimi jojonizues ka natyrë valore elektromagnetike. Lidhur me këto lloj valësh, janë bërë eksperimente me kaviet dhe kanë pasur efekte vdekjeprurëse kur rrezatimi ka qenë i lartë. Studiuesit shprehen për pasojat e këtij rrezatimi duke shpjeguar se mund të kenë efekte termike dhe jotermike. Efektet termike janë efektet që i shkaktohen çdo personi të ekspozuar ndaj antenave. Valët elektromagnetike (rrezatimi jojonizues) në kontakt me qëniet e gjalla, nuk e zbërthejnë qelizën (nuk e prishin strukturën e atomit, si rrezatimi jonizues), por i rrisin energjinë termike, duke shkaktuar nxehje. Sipas biologëve dhe studiuesve, kur nxehja është e madhe, procesi është i pakthyeshëm. Disa nga pasojat e tij janë humbja e elektroliteve në tru të cilat nuk rigjenerohen apo edhe çrregullime mendore. Gjithashtu mund të sjellin edhe sëmundje malinje (kanceroze). Efektet jotermike ende nuk janë vërtetuar shkencërisht por, për njerëzit që kanë kontakt të drejtpërdrejtë dhe janë në rreze shumë të afert me antenat thuhet se kanë lodhje, këputje, përgjumje etj. Studiuesit mbajnë qendrimin që antenat shumë afër zonave të banuara përbëjnë rrezik dhe sidomos stacionet ku janë të instaluara shumë antena. Kjo është edhe arsyeja që këto stacione vendosen në një distancë shumë të largët nga qendrat e banuara. Vlera maksimale e lejuar është 10 W/m2 (sipas standarteve të OBSH). Një kompani e caktuar mund të vendosë antenën e cila ka rrezatim 4 W/m2. Por nëse kemi 3-4 antena me këtë vlerë, atëherë vlera e tyre kalon kufirin dhe rrezatimi kalon në një nivel kritik. Pra, duhet bërë kontroll për çdo antenë të vendosur.
Nuk mund të lihet kjo gjë në dorën e vetë kompanive.

Tashmë edhe shteti shqiptar është i ndjeshëm ndaj këtij rreziku. Janë krijuar institucione, janë miratuar ligje dhe akte nënligjore.
-Konkretisht, Ligji nr.10469, datë 13.10.2011 ?Për mbrojtjen nga rrezatimet jojonizuese? i ndryshuar, detyron subjektet që kryejnë veprimtari me burime të rrezatimit jojonizues që të pajisen me akt miratimi. Neni 4 i këtij ligji parashikon se ?2. Çdo person fizik ose juridik, vendas apo i huaj, është i detyruar të pajiset me akt miratimi nga Komisioni i Mbrojtjes nga Rrezatimet për çdo veprimtari me burime të rrezatimeve jojonizuese?.
-Sipas pikës 9.17 të VKM Nr.805, datë 04.12.2003 ?Për miratimin e listës së veprimtarive që ndikojnë në mjedis, për të cilat kërkohet leje mjedisore?, punimet me rrezatimet elektromagnetike jojonizuese, si dhe sistemet e transmetimit klasifikohen në listën e veprimtarive që ndikojnë në mjedis dhe që kërkojnë leje mjedisore.
Në baze te VKM, nr.994, datë 02.07.2008 ?Për tërheqjen e mendimit te publikut në vendimmarrje për Mjedisin?, Ministria e Mjedisit nëpërmjet agjencisë rajonale, duhet të sigurojë pjesëmarrjen e publikut në vendimmarrje për të gjitha rastet kur kërkohen leje mjedisore apo mund të ketë ndikim tek shëndeti i tyre.
-Ndërkohë, pas vitit 2014, me miratimin e VKM nr. 247, datë 30.4.2014 ?Për përcaktimin e rregullave të kërkesave e të procedurave për informimin dhe përfshirjen e publikut në vendimmarrjen mjedisore?, roli dhe miratimi paraprak i publikut dhe sidomos i banorëve të zonave ku do të ndërhyet është bërë akoma dhe më determinant.

Por, të gjithë jemi të ndërgjegjshëm për realitetin dhe faktin se sa pak apo aspak është pyetur publiku kur është ndërhyrë afër banesave të tyre me vendosje antenash apo pajisjesh transmetimi./Studio ligjore “Ballauri”