Basha si Rama/ Shkel statutin me emërime

15 Shkurt 2016, 09:12, Aktualitet CNA

Kryetari demokrat Lulzim Basha, i cili shpesh është akuzuar se po kopjon Edi Ramën në mënyrën e drejtimit të Partisë Demokratike, nuk e bën këtë vetëm me komandimin dhe emërimin e njerëzve të besuar, por edhe me shkelje statutore, të cilat janë të njëpasnjëshme dhe vazhdojnë të jenë flagrante.

Cityenews ka bërë një monitorim të thjeshtë të shkeljeve statutorre të bëra nga kreu demokrat Basha, pas miratimit të këtij të fundit më shumë se një vit më parë në një kongres formal, ku Basha çimentoi zgjedhjen e besnikëve të tij në parti.

Shkeljet e statutit të kreut demokrat Basha, fillojnë me marrjen e kompetencave bazë të Këshillit Kombëtar, sic është zgjedhja e sekretarëve të dhe drejtuesve të departamenteve, të cilat në bazë të nenit 37/c zgjidhen nga ky Këshill. Në fakt, na rezulton se një pjesë e sekretarëve janë të komanduar dhe jo të zgjedhur sic e parashikon statuti. Për më tepër, së fundmi është emëruar një sekretar ende pa u miratuar nga Këshilli Kombëtar i këtij sekretari.

Në fakt, statuti është injoruar totalisht duke shkelur me të dyja këmbët nenin 37 për emërimin e Jemin Gjanës, Enkeleid Alibeaj, Tomorr Alizoti, Besnik Aliaj, Ardian Turkut dhe së fundmi me emërimin e Ervin Salianjit si sekretar për aksionin qytetar. Janë të paktën 6 shkelje statutore, të cilat zoti Basha mundet ti shmangte duke thirrur Këshillin Kombëtar dhe duke kryer zgjedhjet përkatëse.

Funksionimi i Partisë Demokratike, më shumë se sa statutor duket të jetë formal, nëpërmjet një dalje telveizive që kreu demokrat Lulzim Basha, kryen cdo javë me grupin parlamentar, por kjo nuk do të thotë se ai fjalim është rregullorja e partisë apo respektimi i statutit të saj.

Disa nga figurat e emëruara prej Bashës mund të jenë intelektualë me vlera për opozitën, por partitë politike kanë një statut, i cili duhet zbatuar jo vetëm nga anëtarësia dhe për të prerë koka politikisht, por duhet ti shërbejë si një Bibël apo Kuran forcës politike dhe jo të shkelet si të ishte një letër për koshin e plehrave.

Ashtu si Rama që ka frikë të zbatojë statutin e Partisë Socialiste, në të njëjtën situatë ndodhet edhe kreu demokrat Lulzim basha, i cili e ka më të lehtë të rrëmbejë kompetencat e Këshillit Kombëtar dhe të emërojë humbësit e tij në departamente apo sekretariate se sa ti zgjedhë ashtu sic e parashikon statuti./citynews