Referendum dhe grevë urie për rrëzimin e ligjit të arsimit të lartë

14 Nëntor 2015, 07:23, Aktualitet CNA

Beteja mes universiteteve publike dhe qeverisë për ligjin e arsimit të lartë, duket se do të jetë e gjatë dhe e fuqishme. Ndonëse ligji është miratuar dhe ka hyrë tashmë në fuqi, pedagogë dhe studentë kanë paralajmëruar se nuk do të lejojnë zbatimin e tij në fakultete. Pas protestës të së mërkurës, kur me qindra studentë e pedagogë tubuan para Kryeministrisë, duket se në ditët në vijim do të ketë të tjera aksione dhe masa kundër ligjit për arsimin e lartë.

Arlind Qori, përfaqësues i Lëvizjes për Universitetin, i kontaktuar nga gazeta “Sot”, u shpreh se nëse qeveria nuk tërhiqet, atëherë ata do të bllokojnë jetën universitare. Po ashtu, ai deklaroi se po shihet si mundë- si dhe thirrja e një referendumi. “Aksionet e befasishme dhe protestat do të vazhdojmë. Po ashtu po kërkojmë solidaritet aq të madh universitar sa për të bllokuar krejt jetën universitare publike derisa qeveria të tërhiqet. Në të kundërt, po shqyrtojmë mundësitë e thirrjes së një referendumi popullor për abrogimin e ligjit të arsimit të lartë. Fundja arsimi i lartë s’u përket vetëm universitar- ëve, por krejt shoqërisë, dhe duhet të jetë populli ai që vendos nëse me paratë e tij do të financohen privilegjet e privatëve”, deklaroi ai. Sa i përket sulmit me vezë ndaj kryeministrit Edi Rama, Qori u shpreh se ai ishte një gjest simbolik për të nxitur reagimin e studentëve, me qëllim rrë- zimin e ligjit për arsimin e lartë. Ai paralajmëroi se zbatimi i këtij ligji nuk do të jetë aspak i lehtë.

“Rezistenca është vetëm në fillimin e vitit të saj të tretë akademik. E kemi nisur që në kapërcyellin e 2013-2014 duke kundërshtuar tentativën, tanimë të bërë ligj, të qeverisë për të privatizuar përmbajtjen dhe funksionimin e universiteteve publike. Aksioni simbolik kundër kryeministrit ishte shkëndija që u dha zemër shumë universitarëve dhe qytetarëve se pushteti është i brishtë kur ka përballë qytetarë të paepur, po ashtu u tregoi qeveritarëve se s’kanë për ta pasur të lehtë të bëjnë me arsimin atë ç’kanë bërë prej dekadash me gjithçka tjetër”, u shpreh ai.

Grevat

Përveç studentëve, të cilët kanë paralajmëruar se do të bllokojnë jetën universitare, duket se në mbështetje të tyre do të jenë dhe vetë pedagogët e shumë fakulteteve publike në kryeqytet. Mësohet se disa prej tyre janë duke u përgatitur për ta dërguar ligjin në Gjykatën Kushtetuese, dhe nëse edhe aty dështon përpjekja, nuk përjashtohet mundësia që të shkohet drejt grevave të urisë, në mënyrë që ligji për arsimin e lartë të tërhiqet dhe të rishihet. Një gjë e tillë u paralajmërua shumë muaj më parë nga vetë pedagogët, por duket se ende vijon të qëndrojë si alternativë. Vetë pedagogët kanë thënë se zbatimi i këtij ligji do të shkatërrojë tërësisht universitetet publike, pasi më të përfituarit do të dalin universitetet private. Nga ana tjetër pritet që në javët në vijim protestat e studentëve të jenë më masive dhe me mbështetje nga shumë universitete të rretheve./ Sot