PS fillon zgjedhjet ne baze, afati 30 nentor/ Gati per zgjedhje ne paranvere?

6 Tetor 2015, 05:06, Aktualitet CNA

Kryeministri, Edi Rama, ka thirrur në një takim grupin e punës për zgjedhjet në Partinë Socialiste, ku ka dhënë urdhra dhe direktiva për mbikëqyrjen e procesit zgjedhor në strutkurat drejtuese të partisë. Në takimin e thirrur nga kreu i qeverisë në selinë rozë, ishin të pranishëm ministrat, Bledi Çuçi, Blendi Klosi dhe ministrja, Lindita Nikolla, së bashku me disa deputetë dhe kryebashkiakë si, Dritan Leli, Erion Veliaj dhe Vangjush Dako. Kryeministri Rama i ka kërkuar grupit të punës, që të nisë sa më shpejt procesi për zgjedhjen e krerëve të organizatave, proces i cili duhet të përfundojë deri më 30 nëntor.

Sipas burimeve, Rama i ka urdhëruar deputetët që të zbresin në bazë, për të mbikëqyrur nga afër zgjedhjen e krerëve të rinj të organizatave, por, në ato ditë që janë të angazhuar me veprimtari të rëndësishme të punë së komisioneve parlamentare, të dërgojnë tri-katër të deleguar për çdo organizatë të partisë. Sipas urdhrit të Ramës, për çdo problem që mund të lindë gjatë përgatitjeve dhe procesit zgjedhor të krerëve të organizatave, deputetët duhet të vënë në dijeni bazën dhe qendrën, e më pas të merren masa të menjëhershme për zgjidhjen e problematikave të ndryshme. Pas zgjedhjes së krerëve të rinj të organizatave, ky proces do të pasojë me një tjetër fazë të rëndësishme, në kuadër të ristrukturimit të partisë. Krerët e rinj të organizatave do të zgjedhin më pas krerët e rinj të degëve të Partisë Socialiste në rrethe. Sipas urdhrit të kryeministrit dhe të Asamblesë Kombëtare të PS, nuk do të kenë të drejtë të rikandidojnë për kreun e organizatave dhe kreun e PS, ata individë të cilët nuk arritën pritshmëritë e duhura në zgjedhjet lokale të 21 qershorit.

Në krye të organizatave dhe degëve të PS në rrethe do të kandidojnë njerëz të shquar për aftësi, profesionalizëm dhe përgjegjshmëri, në mënyrë që në zgjedhjet parlamentare të 2017, e majta të mos marrë përsipër të njëjtin risk si në zgjedhjet lokale, ku humbi 15 bashki. Kandidatët nuk do të propozohen nga qendra dhe baza, por të gjithë ata individë që kanë ambicie do vetëshpallin kandidaturën e tyre, dhe më pas do të kryhet një analizë për të propozuar kandidatin e duhur për postin e kryetarit.