E fundit!

10:07 Aktualitet

Gara për drejtuesit e policisë në disa qarqe, përfundon renditja e kandidatëve/ Tre emrat që kryesojnë listën

Është mbyllur procesi i vlerësimit për kandidatët që synoj...

Qeveria dërgon në Kuvend ligjin e gjobave

18 Shtator 2015, 08:09, Aktualitet CNA

Qeveria ka bërë tashmë fakt masat represive ndaj evazorëve dhe tatimorëve që bashkëpunojnë me këta të fundit. Draft ligji i ri, pjesë e paketës së masave ligjore në luftën ndaj informalitetit ka mbërritur në Kuvend dhe siç parashikohet dhe në relacion, miratimi i tij do të bëhet me procedurë të përshpejtuar për arsye se tërësia e masave të propozuara lidhen me forcimin e penaliteteve për shkeljet kryesore në fushën tatimore, të cilat prodhojnë evazion të konsiderueshëm fiskal në mungesën e të ardhurave në buxhetin e shtetit.

Gjobat nga 500 mijë lekë-10 milionë lekë, apo kallëzimet penale për rastet e përsëritura duken një presion i konsiderueshëm ndaj bizneseve që nuk regjistrohen, nuk lëshojnë kupon tatimor apo nuk kanë kasë fiskale. Ndërkohë, largimi nga puna dhe heqja e statusit të nëpunësit, apo dhe kallëzimi penal për tatimorët të cilët bashkëpunojnë me evazorët, duket se do të jenë një arsye e fortë për shkëputjen e këtyre raporteve, që në një farë mënyre kanë luajtur një rol të veçantë në përhapjen e evazionit fiskal.

Ndërkohë, të gjithë ata që e morën me shaka deklaratën e kryeministrit Rama, sipas së cilës çdokush që nuk merrte faturë ose kupon tatimor për një mall apo shërbim, ka të drejtë të largohet pa paguar, tashmë duhet ta konsiderojnë seriozisht. Në ligjin e ri për tatimet parashikohet ekzaktësisht që pas pikës 2, të nenit 46, shtohet pika 3, me këtë përmbajtje: ?Çdo blerësi, person fizik, juridik ose individ, i lind e drejta të mos paguajë për vlerën e mallit ose shërbimit të marrë, nëse shitësi nuk lëshon faturën tatimore ose kuponin tatimor në përputhje me këtë ligj. Për këtë qëllim, tatimpaguesi detyrohet të afishojë në një vend të dukshëm, në adresën ku kryen veprimtarinë, një njoftim për blerësin në përputhje me këtë nen?, thuhet në draft ligjin e ri.

Në nenin 16 të projektligjit propozohet forcim i penaliteteve për mbajtjen, ruajtjen apo transportin e mallrave pa faturë. Nga praktika, problematikë janë të gjithë shitësit më shumicë të mallrave, të cilat i mbajnë mallrat pa faturë tatimore si dhe i shesin (transportojnë) mallrat pa faturë. Kjo kategori tatimpaguesish është edhe kategoria më me risk për këtë çështje.

Kështu, me ligjin e ri, nëse tatimpaguesi që shet mallra me shumicë, që mban në ruajtje, përdor apo transporton mallra të pashoqëruara me dokumente tatimore, dënohet me 3 penalitete: gjobë në masën 10 000 000 lekë; konfiskim të të gjithë sasisë së mallit që mbahej në ruajtje, përdorej apo transportohej, i pashoqëruar me dokumente tatimore (me të drejtë të blerjes së mallit me vlerë tregu); rivlerësim tatimor të të ardhurave për një periudhë 6-mujore që do të thotë se e gjithë vlera e mallit i shtohet të ardhurave të tatimpaguesit për 6 muajt e mëparshëm dhe rivlerësohen detyrimet tatimore për TVSH-në dhe tatim-fitimi pikërisht mbi këtë bazë të re të ardhurash. Mbi këto detyrime gjenerohen edhe kamatëvonesat. Projektligji propozon ndër të tjera dhe forcimin e masave në rast verifikimi të punonjësve të padeklaruar.

Në ndryshimin e propozuar është standardizuar masa e gjobës në 500 mijë lekë për çdo punonjës të padeklaruar, pavarësisht se tatimpaguesi është subjekt si TVSH-së dhe tatim-fitimit apo jo. Në rastet e përsëritura, bëhet kallëzim penal për subjektin. Projektligji parashikon po ashtu një nen të ri për penalizimin e tatimpaguesit që rezulton të ketë deklaruar pagë jo reale për punonjësit e tij në organin tatimor, përveç detyrimit për pagimin e shumës së detyrimeve tatimore dhe kontributeve të sigurimeve shoqërore e shëndetësore, në këtë rast tatimpaguesi dënohet me gjobë në masën 500 mijë lekë për rastin e parë të konstatimit. Nëse rasti përsëritet, atëherë kjo konsiderohet evazion tatimor dhe administrata tatimore ushtron të drejtën për të bërë kallëzim penal për tatimpaguesin.

Në nenin 11 të projektligjit propozohet një masë e re shtrënguese e mbledhjes së borxheve tatimore. Në këtë projektligj propozohet që në funksion të mbledhjes së detyrimit tatimor të papaguar të tatimpaguesit, administrata tatimore mund të angazhojë strukturat e saj për të verifikuar dhe monitoruar në vend aktivitetin tregtar të tatimpaguesit me qëllim konfiskimin në fund të çdo dite të një shume jo më pak se 50% të qarkullimit të realizuar, por jo më shumë se detyrimi tatimor për të cilin ka filluar procedura e mbledhjes me forcë të detyrimeve tatimore, për llogari të detyrimeve tatimore të pashlyera të tatimpaguesit.