E fundit!

08:35 Kronika

Sherr masiv në Sarandë, 6 persona shoqërohen në polici

Një sherr masiv është regjistruar mbrëmjen e së premtes në...

NUK ËSHTË KISHA HALLI YNË / Nga Klodian Tomorri

26 Gusht 2015, 18:07, Aktualitet CNA

Unë e kuptoj ndjeshmërinë publike që shkakton prishja e një objekti kulti. Aq më tepër në Shqipëri, ku kjo rizgjon kujtime të hidhura nga një periudhë e errët e historisë së vendit. Gjithashtu e mirëkuptoj plotësisht sedrën patriotike dhe zemërimin e drejtë kombëtar që shkakton përfshirja e një shteti tjetër në punët tona të brendshme. Por nuk është Greqia problemi ynë. Dhe aq më pak akoma, nuk është kisha e Dhërmiut. Hallet tona janë shumë më të mëdha.

EKONOMIA ËSHTË NË KRIZË TË THELLË
Prodhimi nuk rritet. Deficitet e larta fiskale në vend që të ndihmojnë në rikuperimin e ritmeve të rritjes ekonomike, vetëm sa kanë shtuar pasigurinë financiare dhe frikën e borxhit publik. Biznesi dhe indvidët janë në stres, ndërsa të ardhurat kanë rënë në të gjithe spektrin e tyre duke i vënë familjet e zakonshme përballë një shtrëngimi të paprecedentë

EKONOMIA ËSHTË KRIMINALIZUAR
Grupet kriminale nuk kanë frikë nga shtetit. Fakti që në Shqipëri ka vazhduar trafiku ajror i drogës edhe pas rënies së avionit në Divjakë tregon se sa të fuqishme janë klanet e trafikut në vend. Pjesa e madhe e GDP-së që buron nga aktivitetet kriminale financon dhe ble pushtet. Rrjedhimisht:

INSTITUCIONET JANË KRIMINALIZUAR
Paraja kriminale është arsyeja se pse 20 për qind e deputetëve në parlamentin shqiptar janë njerëz me background kriminal. Ajo është arsyeja se pse në krye të institucioneve të rëndësishme gjenden zyrtarë të dënuar apo që në të shkuarën e tyre kanë patur problem me ligjin. Kriminalizimi i institucioneve ka gërryer themelet morale të shtetit. Por jo vetëm.

KORRUPSIONI ËSHTË VENDOSUR NË SISTEM
Kudo. Në dogana korrupsioni imponon kontrabandën masive në të gjithë mallrat e fortë. Cigare, karburante alkol. Në tatime ai ka krijuar shtratin e evazionit galopant. Ndërsa në entet prokuruese, gropa e korrupsionit thith dhe gllabëron paratë publike. Vecanërisht në kompanitë publike, ku si asnjëherë më parë, drejtori guxon dhe i jep kontratë kryeinxhinierit të tij pa garë, ditën për diell. Janë këto arsye se pse

SHQIPËRINË E KA PLLAKOSUR PESIMIZMI
I kombinuar me krizën ekonomike, korrupsioni galopant krijon një kombinim toksik që minon të ardhmen,. Është kjo arsyeja pse shqiptarët po humbasin shpresën tek Shqipëria. Dhe eksodi masiv është prova e hidhur. Në fund:

VENDI ËSHTË NË DITË TË HALLIT
Ndaj sot Shqipëria ka nevojë dëshpëruese për optimizëm. Qytetarët dhe biznesi kanë nevojë të shohin shpresë. Shoqëria ka nevojë të ndjejë drejtësi. Këto janë hallet tona. Ah sikur të ishte vetëm Kisha.