E fundit!

13:07 Aktualitet

Drejtoresha e Kadastrës tregon afatet/ Ja kur mbyllen legalizimet në Shqipëri

Drejtoresha e Kadastrës Shqiptare, Lorena Gaxhobelli, ndau...

Shefja e financës ikën për azil, mësuesit mbeten dy muaj pa rroga

19 Gusht 2015, 14:25, Sociale CNA

Fenomeni i emigrimit për në Gjermani për të kërkuar azil, nuk ka prekur vetëm familjet e varfra shqiptare, por edhe shumë punonjës të administratës së shtetit. Një prej tyre është edhe shefja e financës së shkollës së mesme profesionale në Kamzë, e cila ka emigruar familjarisht drejt Gjermanisë, ku është regjistruar për azil ekonomik, ndërkohë që me ikjen e saj ka mbetur pa paga i gjithë stafi i këtij institucioni arsimor.

Burime të besueshme nga kjo shkollë bëjnë me dije se financierja është larguar që në muajin korrik, por nuk është njoftuar nga askush, derisa ka ardhur fillimi i këtij muaji, kur është kërkuar të bëhen gati borderotë e pagave për punonjësit e institucionit shtetëror. Në këto kushte, institucioni është vënë në dijeni se ajo kishte emigruar drejt Gjermanisë bashkë me familjen, duke kërkuar azil ekonomik, ashtu si shumë familje të tjera shqiptare. Ikja e saj mësohet se ka shkaktuar problemin e mosdhënies së pagave për 82 punonjës.

Burimet shpjeguan se janë pikërisht 67 mësues dhe 15 punonjës të tjerë të shkollës së Mesme Profesionale në Kamzë që nuk kanë marrë ende pagat e muajit korrik. Ky problem mësohet se fillimisht është ngritur te drejtoresha e shkollës profesionale, por nga të dhënat mësohet se ajo ndodhej me pushime dhe zëvendësimi i financieres nuk mund të kryhet para se ajo të kthehet në detyrë. Tashmë, kur kanë kaluar pothuajse tri javë, arsimtarët kanë humbur shpresën për të marrë pagat deri në muajin shtator-raporton Shqip.

Në lidhje me këtë rast, Ministria e Mirëqenies Sociale tha se po punohet për zëvendësimin e shefes së financës, një proces i cili nuk është kryer ende, megjithëse arsimtarët ankohen se kanë mbetur pa para në këto ditë në nxehta para fillimit të vitit të ri shkollor. ?Janë marrë të gjitha masat, ne kemi caktuar një njeri tjetër. Zonja në fjalë (shefja e financës) ka ikur në Gjermani pa lajmëruar më parë në institucionin ku ajo punonte dhe gjithçka erdhi papritur. Ka dy javë që nuk i kanë marrë, por brenda kësaj jave mësuesit marrin pagat. Zëvendësuesi është gjetur dhe të gjithë do t?i marrin, por kjo erdhi në mënyrë të befasishme?, sqaroi Agron Pëllumbi, drejtor i Arsimit dhe Formimit Profesional në Ministrinë e Mirëqenies Sociale.

Qindra familje shqiptare janë larguar këtë vit drejt Gjermanisë apo vendeve të tjera të BE-së. Këto familje shesin gjënë e gjallë dhe orenditë shtëpiake për të siguruar biletat e udhëtimit drejt vendeve të Perëndimit, ndërkohë që tashmë kanë nisur kthimet e para dhe po ndihen pasojat. Shqipëria nuk hyn në listën e vendeve problematike, ndaj dhe shqiptarët nuk përfitojnë azil dhe si pasojë mjaft shtetas shqiptarë kthehen mbrapsht, duke u përballur me një skamje edhe më të tmerrshme.