Lereni te qete familjen Kajtazi/ Nga Artan FUGA

16 Gusht 2015, 19:30, Aktualitet CNA

Prej dy javesh mediat jane marre me historine e dy vajzave te nje familjeje te thjeshte shqiptare, Kajtazi, qe kishin braktisur shtepine prindrore dhe ishin zhdukur pa lene gjurme.

Bashke me kete arratisje u lidhen edhe nje zjarr ne shtepi, mungesa e parave si edhe nje histori helmimi ne gjelle qe duhet verifikuar.

Bashke me telenovelat e veres qe jane shume terheqese me kotesine e tyre, sidomos ne kohe vape, bashke me historite e shpikura ose te verteta te ndonje skandali politik, emisioneve te lajmeve ose faqeve te para te gazetave u duhej edhe nje lajm ne thellesi qe mund te mbahej lehte dhe te terhiqte vemendjen e audiences.

Media eshte si nje kafshe stermadhe qe kur nuk ka lajme, pra ushqim, eshte e detyruar ta prodhoje ushqimin e vet.

Nuk jamj duke thene se ngjarjen e familjes Kajtazi e prodhoi dhe e stisi media si nje reality show. Nuk kam asnje fakt per kete edhe pertoj ta investigoj. Por, nje gje e di mire, ngjarje si ato ka pafund ne familjet shqiptare. Ikje te femijeve nga shtepia, tensione midis adoleshenteve dhe prinderve te tyre, madje edhe histori dhune ne familje ka pafund si ne Shqiperi ashtu edhe ne Europe e me gjere.

Mjafton te shkosh ne nje komisariat policie dhe gjen sa te duash per t’i raportuar me muaj te tere. Kur ka lajme askush nuk intereson per jeten e famailjes shqiptare, kur lajme nuk ka gjendet nje rast dhe behet terkuze.

U nis si nje lajm, por perfundoi si nje telenovele dramatike.

Mirepo media duhet te vetepermbahet pak, vetepermbajuni pak te dashur miq e kolege.

E para, mos harroni se keni prekur intimitetin e nje familjeje.

Keni hyre brenda nje dhimbjeje te saj, qe ata mund te duan ose do te duheshin ta mbanin ne permasa intime, dhe e beni publike disa here ne disa dhe dite e jave te tera. Me nje fjale keni kthyer nje nje spektakel nje drame intime familjare.

Dikush mund te thote : Por, prinderit vete deshen ta benin publike, aq me shume qe media solli dobi pasi sensibilizoi policine per t’u vendosur ne kerkim te ketyre vajzave…

Argumenti mund te jepet, por nuk i qendron kritikes.

Sepse edhe sikur prinderit te donin ta benin publike dramen e tyre intime, duhet menduar nje cast, sepse jomedoemos prindi, e ka kulturen e mjaftueshme dhe ndergjegjen e mjaftueshme se cfare demi po i ben familjes se vet dhe femijve te vet.

Nese duhej motivuar policia kjo mund te behej me rruge te tjera, me kronike, me intervistime te oficereve te policise, etj., por jo duke paraqitur te gjitha hollesite e jetes familjare qe ne dramaticitetin e ngjarjes se vet, derdhte e zbrazte barkun perpara kamerave, kesaj bote qe eshte sa larg njerzve aq edhe shpesh e magjishme per njerzit e thjeshte.

A duhet te beje media publike raste tensione dhe dhune ne familje, ose ngjarje dramatike ne familje? Po, por,me shume kujdes sepse thyen intimitetin familjar.

Kush nga ne te medias eshte i qete se me raportimet qe ka bere nuk eshte pikerisht pergjegjes qe tani ne ate familje tensionet pas gjetjes te vajzave nuk vijne edhe nga fakti se ngjarja eshte bere publike?

Te gjitha palet atje, duke qene se jane ekspozuar ne publik, vazhdojne lojen qe mund te jete e vertete por mund te jete edhe teatrale. Shpesh here keto ngjarje kane nevoje te trajtohen nga psikologu ose nga eksperte te fushes, te cilet ne intimitetin dhe konfidencen e tyre krijojne mundesine qe jo vetem aktoret e ngjarjes te jene te vertete ne sjelljen e tyre, por edhe te gjejne mundesine per te rikrijuar marredhenien e thyer familjare nese kjo do te ishte e mundur sigurisht.

Dihet qe sjellja perpara kamerave dhe sjellja ne marredhenien e ngushte te skenes familjare jane dy sjellje krejt te ndryshme.

Mos harrojme qe duke raportuar deri ne lodhje kete ngjarje familjare media ndikon ne acarimin e tensioneve brenda familjes dhe e ben ate familje viktime e deshires vuajeriste te audiences qe fatkeqesisht nuk ka sesi te mos jete e tille.

Ngjarja mund te raportohej, por pastaj duhet shoqeruar me analiza te forta ne studio lidhur me konfliktet mes brezave qe gelojne nje shoqerine shqiptare, per tensionet psikologjike, apo per kundershtite mes liberalizmit social ekstrem dhe dogmatizmit e konservatorizmit prindror, te cilet shpesh hyjne ne perleshje te forta mes tyre.

Kush e ka trajtuar hallin e rinjise, sido;os te vajzave qe shpesh here i shoh te traumatizuara, dhe hallin e prinderve qe shpesh i shoh te stresuar per fatin e femijve te tyre?

Askush.

Nderkohe ne kohe vere mbiraportohet nje drame familjare, deri ne kufijte e prekjes te intimitetit familjar, dhe pastaj sapo vjen sezoni i ri, harrohet e mbyllet edhe si tematike.

Mos harrojme qe me duket se nje nga vajzat eshte minorene.

Fotoja e saj del ne ekran dhe ne faqet e para te gazetave, emri i saj publikohet pa asnje kufizim, theniet dhe intervistat e saj botohen gjere e gjate, pa pranine e nje avokati apo te nje personi te rritur te familjes.

Ta leme te qete familjen Kajtazi bash per keto arsye. Provojeni ta beni te njejten gje qe bete me te me familjen e ndonje pasaniku, politikani apo intelektuali, dhe do te shikojme se shume shpejt ceshtja do te shkoje ne gjyq.

Me nje avokat te mire zoti Kajtazi mund te fitoje shume leke me gjobat qe duhet te paguaje media per hir te deshires per te raportuar pertej asaj qe morali dhe ligji e lejojne.

Mos bejme gazetari gjoja investigative me hallet e familjes, por me korrupsionin ose me kapjen per fyti qe disa lobi private u bejne disa nepunesve duke i detyruar te kendojne me deklarata shtypi sipas midese te tyre.

Kur them lereni te qete familjen Kajtazi, nuk dua te them qe lereni ne vetmine e saj. Jo, por psikologu, shoqatat qe marrin fonde per kete pune, policia, e bejne punen e tyre ne diskrecionin e domosdoshem qe i ndihmon edhe te respektojne intimitetin familjar, por edhe ta ushtrojne profesionin si duhet.