Ne hetim per korrupsion, KLD pezullon dy gjyqtare

10 Korrik 2015, 15:01, Kronika CNA

Këshilli i Lartë i Drejtësisë pezullon nga detyra dy gjyqtarë të akuzuar për korrupsion. Gjatë shqyrtimit në mbledhjen e sotme të informacionit të ardhur nga Prokuroria e Përgjithshme lidhur me procedimet penale ndaj gjyqtarëve Rasim Doda dhe Parashqevi Ademi, u vendos pezullimi i tyre nga detyra, deri sa të merret një vendim gjyqësor i formës së prerë, për çështjen penale në ngarkim të tyre. Gjyqtarja e Lezhës, Parashqevi Ademi akuzohet për korrupsion, pasi u kap bashkë me avokatin Gjovalin Ndoka duke i marrë para një klienti. Ndërkohë gjyqtari i Sarandës, Rasim Doda është në hetim pasi ka marrë para për të mbyllur një çështje. Çështjet e tjera të mbledhjes Në vijim KLD shqyrtoi plotësimin e tre vendeve vakante, në Gjykatën e Shkallës së Parë për Krimet e Rënda. Këshilli i Lartë i Drejtësisë në përzgjedhjen e gjyqtarëve që do të jenë pjesë e kësaj trupe gjyqësore u fokusua rigorozisht vetëm në kandidatët me pikët më të larta sipas sistemit të pikëzimit. Pas përfundimit të procesit të votimit, Këshilli i Lartë i Drejtësisë me shumicë votash, vendosi t’i propozojë Presidentit kandidaturat e Daniela Shirka, Miliana Muça dhe Bib Ndreca. Në përputhje me rendin e ditës, anëtarët e KLD-së, diskutuan dhe shqyrtuan propozimin për emërimin e një inspektori pranë Inspektoratit të Këshillit të Lartë të Drejtësisë. Pasi diskutimeve me shumicë votash anëtarët e KLD-së, vendosën të emërojnë inspektor pranë Inspektoratit të Këshillit të Lartë të Drejtësisë, Ndue Gjura, aktualisht gjyqtar pranë Gjykatës së Rrethit Gjyqësor Durrës. Gjithashtu, KLD shqyrtoi projekt-aktet përfundimtare të vlerësimit, për vitet 2007-2009, të Kryeinspektorit të Inspektoratit të Këshillit të Lartë të Drejtësisë, në zbatim të Vendimit të Këshillit të Lartë të Drejtësisë Nr. 261/2, datë 14.04.2010 “Sistemi i Vlerësimit të Gjyqtarëve”. Pasi shqyrtoi ankimet përkatëse, Këshilli miratoi aktet e vlerësimit për tre gjyqtarët Ariola Kristo, Rrethi Gjyqësor Korçë; Flora Hasimi, Rrethi Gjyqësor Durrës; Shpëtim Reka, Rrethi Gjyqësor Durrës. KLD vendosi edhe delegimin e disa gjyqtarëve në shqyrtimin e çështjeve të caktuara gjyqësore, në gjykata të tjera nga ku ata janë emëruar për të ushtruar funksionin e gjyqtarit.