E fundit!

11:38 Aktualitet

Rrëshqitje dheu në Kodër Currila/ Rrezikohet pallati

Rrëshqitje dheu janë regjistruar në Kodër Currila në orët ...

4 thyerjet në raportet mes Edi Ramës dhe amerikanëve

17 Qershor 2015, 05:37, Politikë CNA

Një tis nervozizmi, zymtësie dhe zhgënjimi përshkon prej muajsh marrëdhëniet mes kryeministrit Edi Rama dhe prezencës diplomatike të Shteteve të Bashkuara të Amerikës në Tiranë. Krisje serioze raportesh apo thjeshtë objeksione dhe qasje të kundërta për çështjen e dekriminalizimit, kjo mbetet për t?u parë në javët në vijim, por në horizont ka re të zeza.

Vendin e gjuhës diplomatike dhe të daljeve të përbashkëta Rama-Donald Lu tashmë e kanë zënë mesazhet e forta, gjuha e prerë e amerikanëve, paralajmërimet për bllokim vizash dhe izolim ndërkombëtar, thirrjet për ndëshkimin e politikanëve kriminelë me votë dhe anulimi i takimeve. Pas divergjencave dhe lëkundjeve të raporteve për armët kimike, deklaratave me frymë nacionaliste dhe për Byronë Kombëtare Hetimore, çështje këto të tejkaluara gjithsesi, Uashingtoni dhe qeveria shqiptare ndajnë qëndrime dhe pikëpamje krejt të kundërta për çështjen e dekriminalizimit.

Shtetet e Bashkuara të Amerikës, nëpërmjet ambasadorit në Tiranë, kanë shprehur vendosmërinë për të ndarë politikën dhe shtetin shqiptar nga bota e krimit. Në mënyrë të përsëritur dhe të prerë, Uashingtoni i ka kërkuar përjashtimin nga zgjedhjet lokale të disa kandidatëve me rekorde kriminale dhe me identitete të shumëfishtë, të identifikuar dhe skeduar tashmë nga ambasada amerikane dhe prokuroria. Flitet për tre kandidatë të propozuar nga Edi Rama, dosjet e të cilëve kanë shkuar tashmë në tavolinën e tij.

Nga ana tjetër, pavarësisht presionit dhe trysnisë në rritje të Perëndimit, kryeministri Edi Rama ka demostruar shenja rezistence, duke refuzuar largimin e të pakën tre kandidatëve të inkriminuar, nga zgjedhjet e 21 Qershorit. Pas një heshtje të gjatë, kur pritej një reflektim nga ana e kryeministrit Rama, ky i fundit befasoi dy ditë më parë, duke sfiduar hapur partnerët kryesorë strategjikë të shqiptarëve. Kryeministri jo vetëm nuk pranoi të largonte tre kandidatët e inkriminuar, por deklaroi se asnjë nga kandidatët e tij, nuk kishte lidhje me krimin dhe nuk ishte i dënuar. ?Ajo që ju them unë me siguri është se në të 61 kandidatët e koalicionit të Aleanca për Shqipërinë Evropiane nuk ka asnjë të dënuar, për asnjë lloj vepre penale. Pastaj fakte prova, dyshime historira nuk janë pjesë e politikës nuk janë pjesë e detyrës sime si kryetar i PS?, tha Rama.