Dekriminalizimi, ja 39 veprat penale që largojnë kandidatët e inkriminuar

31 Maj 2015, 09:33, Politikë CNA

Pas presionit dhe trysnisë në rritje nga Shtetet e Bashkuara të Amerikës dhe Bashkimi Evropian, shumica në pushtet, më në fund, ka hedhur një hap konkret, për të ndarë qeverisjen lokale nga bota e krimit dhe e mafies. Mazhoranca qeverisëse ka vendosur të përfshijë në kalendarin e punimeve paketën e saj të dekriminalizimit, paketë e cila i jep fund kapjes së shtetit nga krimi, duke spastruar me ligj të inkriminuarit nga qeverisja vendore dhe qendrore.

Por çfarë parashikon konkretisht paketa e dekriminalizimit, e cila pritet të miratohet në ditët në vijim nga Parlamenti Shqiptar? Cilat janë veprat penale që penalizojnë kandidatët për kryetar bashkie? Çfarë pasojash dhe reaksioni zinxhir do të sjellë miratimi i paketës së dekriminalizimit? Drafti i mazhorancës parashikon përjashtimin nga e drejta për të kandiduar dhe për t’u zgjedhur për 20 vjet me radhë të gjithë personave të shpallur në kërkim ndërkombëtarisht si dhe të atyre që janë dënuar për vrasje, pjesëmarrje në banda, trafiqe, pengmarrje, etj. Ndërkaq, përjashtohen për 10 vjet ata të cilët janë dënuar për vepra të tjera penale jo më pak se dy vjet burg. Ata të cilët janë dënuar vetëm me 6 muaj burg, do të lejohen të kandidojnë, mjafton të kenë kryer dënimin.

Por, drafti pritet të hapë debate dhe polemika të mëdha. Drafti përjashton në mënyrë të qëllimshme dhe kompromentuese deputetët, ministrat, drejtorët, prokurorët, gjyqtarët etj., nga procesi i dekriminalizimit. Ligji përfshin vetëm kandidatët për zgjedhjet lokale. Ndërkaq, në Parlamentin Shqiptar përflitet se një pjesë e konsiderueshme e deputetëve janë me rekorde kriminale. Opozita pretendon se 19 deputetë të inkriminuar i përkasin mazhorancës. Drafti i ri i shpëton deputetët nga verifikimi dhe penalizimi. Ndaj lufta e amerikanëve me politikën e Tiranës, për dekriminalizimin, është e hapur. 39 vepra penale Në paketën e dekriminalizimit të dorëzuar në Kuvend nga socialistët janë përcaktuar plot 39 vepra penale që përjashtojnë kandidatët e inkriminuar.

Nëse ata kanë kryer një prej këtyre veprave, nuk kanë të drejtë të kandidojnë apo të zgjidhen për plot 20 vjet. Por çfarë parashikohet në këto 39 vepra penale? Së pari përjashtohen nga kandidimi ata persona që janë të përfshirë në genocid, krime kundër njerëzimit, apo që kanë kryer vrasje. Një tjetër kategori janë personat që kanë kryer rrëmbime dhe trafikime te njerëzve, si dhe ata që janë dënuar për rrëmbim avionësh, anijesh dhe mjetë të tjera. Sipas përcaktimeve të bëra në paketën e dekriminalizimit, nuk kanë të drejtë të kandidojnë apo të zgjidhen edhe ata persona që janë dënuar për trafik armësh, lëndësh narkotike, apo prodhim armësh dhe droge. Po ashtu edhe personat e akuzuar për korrupsion, krijimin dhe pjesëmarrjen në banda dhe organizata kriminale, apo që kanë bërë financimin e tyre. Të gjithë ata persona të dënuar për këto vepra penale për 20 vjet nuk kanë të drejtë të garojnë në zgjedhje.

Veprat e lehta penale

Një tjetër përcaktim në projektligj është se përjashtohen nga kandidimi dhe personat e dënuar për vepra të lehta penale, si vjedhje, etj, vepra që janë dënuar jo më pak se 2 vite burgim. Këta persona nuk kanë të drejtë të kandidojnë në zgjedhje për 10 vjet. Drafti, i cili pritet të miratohet nga Parlamenti në ditët në vijim, parashikon gjithashtu shpalljen e pavlefshme të zgjedhjeve në një bashki të caktuar, kur fitues ka dalë kandidati me të shkuar kriminale. Edhe nëse kandidati ka mashtruar me dëshminë e penalitetit,ndaj tij do të nisin verifikimet dhe hetimet në çdo kohë, dhe nëse rezulton i dënuar apo në kërkim ndërkombëtar, do të humbë menjëherë mandatin