E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Zbulohet korrupsioni ne Dogana, pse iku Spiropali

26 Maj 2015, 15:01, Aktualitet CNA

Për dorëheqjen e Elisa Spiropalit nga drejtoreshë e Përgjithshme e Doganave u fol pak, ose aspak. Dikush u kujdes që ikja e saj të ishte sa më pak e bujshme, pa shumë komente, madje mundësisht të lidhej me faktin që ajo sapo ishte bërë nënë. Por dorëheqja e Elisës nuk ishte diçka personale. Ajo nuk kishte të bënte aspak me lindjen e Naltës, ashtu si vetë Elisa e paraqiti tre muaj më parë.
“…Unë sapo përjetova momentin më të rëndësishëm në jetën e një gruaje, lindjen e fëmijës së parë. Prandaj edhe dua mirëkuptimin tuaj për ndërprerjen e shërbimit tim në krye të Doganës Shqiptare”, shkruante Elisa më 6 mars duke renditur më pas sukseset e saj gjatë një viti e gjysëm në atë detyrë. Por që me ikjen e saj e deri më sot, kryeministri Edi Rama nuk ka përmendur publikisht asnjë sukses të ish drejtoreshës së tij, as si bletë punëtore dhe as si shembull që duhet ndjekur. Burime pranë kryeministrit thonë se ai madje ka ndërprerë çdo komunikim me të. Çfarë kishte ndodhur? Ishin rezultatet e dobëta të doganave që provokuan zemërimin e Edi Ramës, apo kishte dhe diçka tjetër? Përse emërimi i bujshëm që kryeministri i bëri Spiropalit u pasua nga largimi i heshtur i saj?
Pa dyshim që për kryeministrin që kishte premtuar Rilindjen ky emërim qe një dështim. Dhe kjo jo thjesht prej numrave dhe rezultateve. Një informacion i rezervuar, të cilin Rama e kishte tashmë në duar, bënte fjalë për një abuzim të tmerrshëm në dogana që arrinte në miliona euro. Disa struktura të informacionit i kanë raportuar numrit një të qeverisë se një grup doganierësh, që njihej si “grupi i drejtoreshës” i kishin hapur rrugë kontrabandës duke përfituar shuma të mëdha në mënyrë korruptive. Kështu, pas shumë vitesh ndërprerje, i ishte hapur rruga zhdoganimeve fiktive të mallrave që vinin nga Kina, ku mendohet se për një maune abuzimi shkonte rreth 30- 40 mijë euro. Deklarimi i ndryshëm nga ai i mallit që hyn në Shqipëri, i hapte rrugë një korrupsioni të pastër, ku ishin të ëprfshirë një zinxhir funksionarësh publikë, nga doganierët e thjeshtë, tek drejtorët e turnit, shefat e degëve e deri në zyrat qëndrore në Tiranë. Bashkë me mallrat kinezë, nuk mungonte edhe futja e cigareve kontrabandë dhe mjaft shkelje të tjera. Grupi i përfshirë në këto afera ishte aq i mbrojtur sa në një moment të caktuar, kjo masakër në dogana bëhej thuajse hapur fare dhe me arrogancë. Deri ditën kur kupa jo vetëm u mbush, por filloi të derdhej.
Përballë kësaj gjendje, Edi Rama u detyrua të ndërhynte menjëherë. Ai i dha kompetenca të plota dhe hapësirë të pakufishme veprimi, numrit dy të doganave, hetuesit të vjetër Zamir Shtylla (në foto me Spiropalin). Kërkoi menjëherë largimin e Elisa Spiropalit dhe komandoi përkohësisht në vend të saj, zëvendësministren e Financave. Caktimi i Irena Beqirajt u bë thjesht për të shuar zhurmën që mund të krijonte largimi i spiropalit, pasi në fakt kryeministri ia kaloi gjithë pushtetin në dogana Zamir Shtyllës. Ky i fundit, hetues gjatë komunizmit dhe drejtor i hetimit në Prokurinë e Përgjithshme gjatë kohës së Ina Ramës, zbuloi nga afër masakrën që ishte bërë në dogana. Duke patur dorë të lirë ai nisi menjëherë spastrimet duke goditur të gjithë të emëruarit nga Spiropali si dhe njerëzit që kishin qenë të afërt me të. Largimet dhe transferimet ishin të shumta. Një pjesë e stafit të Spiropalit, të frikësuar nga ndonjë hetim i mundshëm, paraqitën vetë dorëheqjen tek Zamir Shtylla. Këto goditje, ndonëse u bë ç’ishte e mundur të mbaheshin larg vëmendjes së publikut, nuk kaluan pa u vënë re. Vetë zv/ministrja Beqiraj, në një konferencë për shtyp të 28 prillit, një muaj më parë, do të deklaronte se “akoma ka elementë të korruptuar brenda administratës doganore dhe tatimore” dhe se 8 doganierë ndodheshin në proces hetimi në bazë të “informacioneve të përpunuara brenda zyrave të institucionit dhe të tjerë janë në proces hetimi”.
Pra një spastrim total, ku disa anëtarë të “grupit” të Elisës u vunë nën hetim, disa dhanë dorëheqjen për t’i shpëtuar hetimit dhe disa u transferuan në pika periferike doganore. Në të gjithë këtë aksion, dora e Zamir Shtyllës nuk ka kursyer asnjë nga njerëzit e ish drejtoreshës. E cila tha se u largua për shkak se u bë nënë, por në fakt po rezulton se ka qënë nëna e një shpartallimi të vërtetë në doganat shqiptare.
Pikërisht kjo gjendje e ka detyruar kryeministrin të heshtë dhe të ulë kokën për të mos pranuar publikisht dështimin me emërimin e vajzave punëtore në krye të institucioneve publike. Ai nuk mund të këndojë për Elisën në konferenca shtypi. Doganat e Rilindjes u bënë doganat e Rikthimit, duke risjellë edhe njëherë kohën e Fatos Nanos. Një shëmbull i pastër i asaj se qeverisja dhe administrata Rama tjetër gjë thonë e të tjera bëjnë.