web counter
LEXO PA REKLAMA!

SHKARKO APP

App Store
Google Play

Takimi Mustafa-Vuçiç në Bruksel përfundon pa marrëveshje të re

22 Prill 2015, 06:03, Aktualitet CNA

Ka përfunduar në Bruksel raundi i radhës i bisedimeve midis kryeministrave të Kosovës dhe Serbisë, Isa Mustafa dhe Aleksandar Vuçiç. Ndërmjetësuesja e dialogut, shefja e politikës së jashtme të Bashkimit Evropian, Federica Mogherini, ka bërë të ditur përmes një deklarate për media se dy palët kanë analizuar përparimin e bërë në zbatimin e marrëveshjeve të arritura në dialog, duke vënë theksin te zbatimi i Marrëveshjes për Drejtësinë dhe fillimi i zbatimit të marrëveshjeve për Mbrojtjen Civile, raporton Radio Evropa e Lirë.

?Dy palët po ashtu kanë shkëmbyer pikëpamjet për çështjet kryesore të pazgjidhura: energjinë, telekomin dhe krijimin e Asociacionit të komunave serbe. Në këtë drejtim, ata janë pajtuar që të ndërmerren hapa konkretë deri në takimin e ardhshëm?, thuhet në deklaratën e Mogherinit. Kryeministri Mustafa, duke folur për gazetarët pas takimit, ka thënë se ka përafrime sa i përket çështjes së energjisë.

Ai po ashtu ka njoftuar se është bërë një axhendë e marrëveshjeve që duhen bërë për kodin telefonik. Mustafa ka thënë se nuk është diskutuar për asnjë modalitet të Asociacionit të Komunave Serbe dhe se çdo modalitet duhet të jetë në kuadër të Kushtetutës së Republikës së Kosovës. Kryeministri i Serbisë, Vuçiç, ka thënë se mbeten shumë ?vështirësi? sa i përket energjisë dhe telekomit, por ka shfaqur shpresën për më shumë përparim në takimin e radhës, që do të mbahet në muajin maj.

Mustafa, megjithatë, ka thënë se nuk ka pasur diskutime për kushte apo privatizim. Bisedimet midis Kosovës dhe Serbisë kanë për qëllim normalizimin e marrëdhënieve midis dy vendeve, çfarë është edhe kusht për përparimin e tyre drejt integrimit në BE.

 





Lajmet e fundit nga