E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vendosur masën e sekuestrimit pasu...

Universitetet e rretheve në unison kundër ligjit të Nikollës, raport për rrëzimin e kapitullit 12

12 Prill 2015, 12:15, Aktualitet CNA

Të gjitha universitetet në vend janë bërë bashkë kundër draftit të qeverisë për arsimin e lartë. Pas kundërshtive të ardhura nga Universiteti i Tiranës, edhe universitetet e rretheve janë në unison kundër tij, pasi drejtuesit e tyre i kanë bërë thirrje Ministrisë së Arsimit që të ndryshojë ligjin e ri, i cili pritet që shumë shpejt të diskutohet në komisionet parlamentare.

Mësohet se të gjithë universitetet në vend, duke filluar nga ai i Durrësit, Elbasanit, Vlorës, Shkodrës, Korçës, etj, kanë shfaqur rezerva ndaj këtij drafti dhe një pjesë e tyre i kanë dërguar raporte Ministrisë së Arsimit, ku i kanë shfaqur pakënaqësitë dhe sugjerimet e tyre. Burime për gazetën ?Sot? kanë thënë se kundërshtitë më të mëdha kanë qenë për kapitullin 12. Drejtuesit e këtyre universiteteve janë skeptikë ndaj tij, duke kundërshtuar kthimin e universiteteve në institucione të larta publike të pavarura. Stafet akademike kanë thënë se me këtë proces do të mund të përfitojnë fonde dhe universitetet private dhe sipas tyre, një gjë e tillë nuk duhet të ndodhë. Po ashtu një pikë tjetër që ata kanë kundërshtuar është edhe çështja e autonomisë. Universitetet janë kundër Bordit të Administrimit dhe një sërë agjencish të tjera që krijohen me ligjin e ri, pasi pretendojnë se me anë të tyre qeveria do të rrisë kontrollin ndaj universiteteve.

Universiteti i Elbasanit

Këto qëndrime janë vërtetuar edhe nga rektori i Universitetit të Elbasanit, Liman Varoshi, i cili në një prononcim për gazetën ?Sot? është shprehur se Rektorati i këtij universiteti ka pasur rezerva ndaj draftit. Ai ka thënë se ka pasur disa objeksione, të cilat i janë përcjellë ministrisë në mënyrë që të reflektohen në draft. ?Ne mendojmë që një ligj i ri ishte i nevojshëm ku të reflektohen gjitha ndryshimet që kanë ndodhur në këtë vite. Por duhet një ligj që afirmon dhe figuron cilësinë e procesit mësimor të shkollave të larta. Në funksion të përmirësimit të këtij ligji ne kemi bërë një raport me objeksionet tona dhe i kemi dërguar?, është shprehur ai.

Financimi i privatëve

Një ndër pjesët që është kritikuar nga Universiteti i Elbasanit, është kapitulli 12, i cili ditët e fundit është kundërshtuar ashpër nga shumë drejtues fakultetesh në Universitetin e Tiranës. Rektori Varoshi është shprehur se ky kapitull lë vend për financimin e universitete private. Po ashtu ai ka shfaqur rezerva edhe ndaj Bordit të Administrimit. ?Shqetësimi ynë kryesor ka të bëjë me procesin e financimit. Nuk ka garanci që realisht ky draft do të ndihmojë universitete publike apo ato private. Pra kërkojmë një rregullim të kapitullit 12. Gjithashtu jemi për një rregullim të kompetencave mes Bordit të Administrimit dhe Senatit. Ne jemi gjithmonë në favor të Senatit. Në fund të fundit universiteti është institucion akademik dhe udhëhiqet nga vizion akademik. Bordi i Administrimit nuk garanton autonominë e universiteteve, duke e vënë atë në dyshim?, tha ai. Varoshi u shpreh se Universiteti i Elbasanit është që të ketë më tepër përparësi mendimi, vizioni dhe koncepti akademik./Gazeta SOT