Hyjnë në fuqi kriteret për ndërtimet pa leje dhe shtesat

12 Prill 2015, 11:36, Aktualitet CNA

Hyjnë në fuqi kriteret dhe procedurat e reja për kualifikimin e ndërtimeve pa leje, si dhe për shtesat në ndërtimet me leje. Vendimi i qeverisë i cili u miratua pak ditë më parë, është botuar tashmë në Fletoren Zyrtare, çka i jep dhe fuqinë ligjore. Sipas këtij vendimi, objektet pa leje dhe shtesat në një ndërtim me leje, do kualifikohen për legalizim kur nga pikëpamja ndërtimore: kanë minimalisht të ndërtuar një kat mbi ose nën tokë; janë të ndërtuara me materiale të qëndrueshme, të ngritura, të paktën në strukturë dhe janë të lidhura pazgjidhshmërisht me tokën. Në kuptim të kësaj pike, ndërtimi informal nuk është në kushtet e nenit 35, të ligjit nr. 9482, datë 3.4.2006, kur më shumë se 50% e sipërfaqes së truallit, mbi të cilin ai ngrihet, disponohet nga poseduesi i këtij ndërtimi informal me dokumentacion pronësie.

Ndërtimi informal i llojit ?objekt?, i ngritur brenda vijës kufizuese të zonës informale përjashtohet nga legalizimi kur shkel distancat e lejuara të rrugëve ekzistuese, cenon sistemin ose shkel brezin mbrojtës të vijës hekurudhore; është ngritur brenda vijës kufizuese të parcelës ndërtimore të ndërtesave publike; është ngritur brenda zonës mbrojtëse të objekteve të trashëgimisë kulturore; është ngritur brenda zonave dhe/ose nënzonave të mbrojtura, apo zonave të ruajtjes së veçantë; është ngritur brenda territorit/vijës kufizuese të parcelës ndërtimore të ndërtesave objekt kulti; është ngritur mbi ose shkel brezin mbrojtës të tubacionit të gazsjellësit, naftësjellësit, aeroportit, portit apo cenon sigurinë e digave të mëdha; preket nga projektet e infrastrukturës rrugore dhe të sistemeve të linjave energjetike të interkonjeksionit; është ngritur brenda distancës në të cilën nuk lejohen ndërtime, nga brigjet e deteve dhe liqeneve.

Legalizimi i shtesave në ndërtim me leje, i nënshtrohet të njëjtave kritere me përjashtim të parashikimit për shkeljen e distancave ndaj rrugëve ekzistuese. Për këto vepra të infrastrukturës publike shtesat do të përjashtohen nga legalizimi vetëm nëse shkelin trupin e rrugës. Për këto vepra të infrastrukturës publike, shtesat do të përjashtohen nga legalizimi vetëm nëse shkelin trupin e rrugës. Ndërtimet informale, të ngritura brenda kufirit të vijës turistike, nëse cenojnë infrastrukturën rrugore, të parashikuar në dokumentet e planifikimit të territorit, të miratuara sipas legjislacionit në fuqi, nuk legalizohen.