Hollandë/ Bushati: Orientimi i Ballkanit Perëndimor drejt BE-së ka krijuar stabilitet

31 Mars 2015, 17:55, Politikë CNA

Ministri i Jashtëm i Shqipërisë, Ditmir Bushati, ka mbajtur sot fjalën në Institutin Clingendael ne Hollandë, ?Kur është një rajon një rajon i vërtetë? Disa mendime mbi Ballkanin Perëndimor?.

Bushati nëpërmjet një postimi në faqen e tij Facebook publikon fjalën e mbajtur në Institutin Clingendael, ku shprehet se ?Nga këndvështrimi im, përkrah gjuhës së përbashkët, kulturës, fesë dhe gjeografisë, një rajon është rajon i vërtetë, kur njerëzit e tij vendosin që duan të jetojnë së bashku. Mungesa e komunikimit, pengesat gjeografike, edhe një histori fatkeqe mund të tejkalohen, kur një rajon bazohet në vlera të përbashkëta; dhe vlerat për të cilat ne kemi deklaruar angazhimin tonë, janë ato vlera mbi të cilat BE-ja është ndërtuar?.

Po ashtu, Bushati sjell në vëmendje faktin se ?Ballkani Perëndimor ka pasur një rrugë të vështirë gjatë dy dekadave të fundit: kemi parë fqinjët tanë teksa përjetonin gjakderdhje, shkatërrim e dobësi; si një demokraci e re, edhe ne kemi pasur sfidat tona. Por, tashmë kemi filluar të kuptojmë njëri-tjetrin, rëndësinë e vlerësimit të dallimeve tona dhe shfrytëzimin e pikave të forta që kemi. Më lejoni t?ju jap një shembull: nëntorin e kaluar, Kryeministri i Shqipërisë zhvilloi vizitën e parë të një lideri shqiptar në Serbi që prej vitit 1946. Kjo nuk ishte e lehtë, por ndihmoi për të krijuar kushtet për një marrëdhënie normale mes Shqipërisë dhe Serbisë, e cila është kyç për stabilitetin demokratik të rajonit dhe avancimin e saj drejt BE-së?.

?Vlen të përmendet se orientimi i Ballkanit Perëndimor drejt BE-së ka krijuar gjithashtu një shkallë solidariteti ndërmjet vendeve tona. Por, deri ku shkon ky solidaritet i frymëzuar nga Brukseli? Kriza në Ukrainë ka treguar se ai ka kufijtë e tij kur interesat dhe axhendat kontradiktore kombëtare vihen në lojë. Shqipëria ka një rekord absolut në pozicionimin me BE-në në politikën e jashtme; jo të gjithë në Ballkanin Perëndimor e kanë. Kjo do të thotë se ne ende nuk jemi dhe nuk veprojnë si një rajon i vërtetë?, thekson Bushati.

?As Bashkimi Evropian dhe as Ballkani Perëndimor nuk e kanë luksin të mbeten peng e një qasjeje pasive dhe procesi i anëtarësimit në BE të mbetet një perspektivë e largët?, shprehet Bushati, duke vijuar e sjell në vëmendje faktin se ?Gushtin e kaluar, Kancelarja gjermane, Angela Merkel, drejtoi Samitin në Berlin me vendet e Ballkanit Perëndimor. Ajo që ne e quajmë ?Procesi i Berlinit?, është një mundësi për të rigjallëruar procesin e pranimit në BE dhe për ta ndihmuar atë të mbetet një mjet për të transformuar Ballkanin Perëndimor në një entitet me demokraci të qëndrueshme dhe ekonomi të begatë. Këtë gusht që vjen, Procesi i Berlinit do të vazhdojë me një tjetër Samit në Vjenë. Përpara Samitit, Shqipëria në mënyrë aktive po koordinon përpjekjet për të pasur një paketë koherente të projekteve infrastrukturore që do të rrisnin lidhjen e rajonit. Unë besoj se është në interesin e të gjitha shteteve anëtare të BE-së dhe veçanërisht i Holandës, që ky proces te jetë i suksesshëm? thekson Bushati.