E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Serbi: Dilema mes Europës e Rusisë

20 Mars 2015, 16:45, Aktualitet CNA

Qytetarët serbë preferojnë Rusinë më shumë se Bashkimin Europian, por ende duan të bashkohen me bllokun, për shkak të përmirësimit të perceptuar të kushteve të jetesës, sugjeron sondazhi i publikuar nga EurActiv.

Sipas sondazhit të kryer nga Ipsos Strategic Marketing për agjencinë e lajmeve Beta të Serbisë, 52% e serbëve kanë një perceptim pozitiv në lidhje me Rusinë dhe vetëm 32% kanë një pikëpamje pozitive ndaj BE-së. Megjithatë, 54% e të anketuarve do të kishin mbështetur bashkimin me bllokun prej 28 anëtarësh nëse do të votohej që sot për anëtarësim në BE.

Ata që janë në favor të anëtarësimit në Bashkimin Europian besojnë se kjo do të përmirësojë situatën ekonomike, reduktojë papunësinë dhe do të ndihmojë në luftën kundër korrupsionit në Serbi. Por vetëm një serb në katër është i vetëdijshëm se Beogradi është angazhuar në bisedimet e anëtarësimit në BE një vit më parë.

Si Rusia ashtu dhe BE-ja, aktualisht perceptohen më pozitivisht nga serbët se në shkurt të vitit 2014, kur u zhvillua sondazhi i mëparshëm. Në fillim të 2014-s, 46% e serbëve thanë se ata preferojnë Rusinë dhe 27% thanë se ata ndajnë një qëndrim pozitiv ndaj BE-së.

Gjatë muajve të fundit, marrëdhëniet e Rusisë me Perëndimin, përfshirë Bashkimin Europian, janë përkeqësuar për shkak të situatës në Ukrainë, teksa Shtetet e Bashkuara dhe aleatët e saj akuzuan Rusinë për ndërhyrje në punët e brendshme të Ukrainës dhe vendosën sanksione ndaj Moskës.

Zyrtarët e lartë serbë, përfshirë Presidentin e vendit, Tomislav Nikoliç, dhe Kryeministrin Aleksandër Vuçiç në mënyrë të përsëritur kanë deklaruar se Serbia nuk do të bashkohet kurrë me sanksionet perëndimore, duke sakrifikuar bashkëpunimin e saj me Rusinë për hir të bashkimit me BE-në.