Ndotja akustike, probleme në dëgjim dhe shëndetin mendor

25 Shkurt 2015, 13:00, Sociale CNA

Nëse qëndrojmë në zhurma për një kohë të gjatë, atëherë secili prej nesh rrezikon të humbasë dëgjimin. Shqiptarët përveç sëmundjeve të cilat i kanë të trashëguara apo që lindin gjatë viteve të jetës, kanë edhe një faktor tjetër, i cili ndikon në rritjen e sëmundshmërisë.

Janë pikërisht zhurmat akustike ato që ndikojnë në uljen e dëgjimit, agresivitet, çrregullime psikike dhe deri në probleme kardiovaskulare. Të jetosh në Tiranë, duhet të marrësh përsipër kosto të larta shëndetësore. Ndotja akustike, e cila në kryeqytetin shqiptar tejkalon disa herë normat e vendosura nga Bashkimi Evropian sipas mjekëve shkakton tek qytetaret probleme serioze në shëndetin e tyre. Me ekspozimin ndaj zhurmave mesatarisht të larta për një kohë më të gjate se të lejuar, tek qytetarët fillojnë të ndihen shenja shqetësuese si oshtime në vesh, zërat e jashtëm vijnë të mbytur dhe të zbërthyer. Megjithatë, në varësi të kohëzgjatjes së zhurmës shkaktare, rikuperimi mund të vijë për një periudhë prej disa minutash deri orësh e ditësh. Në se ky dëmtim nuk rikuperohet para se të vijë një ekspozim tjetër i ekzagjeruar zhurmash dëmtimi i dëgjimit është në një rrugën pa kthim.

Po ashtu sipas të dhënave të Organizatës Botërore të Shëndetësisë, ndotja akustike ul pro-duktivitetin dhe aftësinë për të mësuar, rrit aksidentet dhe kontribuon në përdorimin e barnave narkotike. Për më tepër, kërkimet kanë treguar se në rastet kur njerëzit nuk mund të bëjnë asgjë kundër ndotjes akustike, ata demotivohen, u duket më e vështirë për të zgjidhur problemin dhe heqin dorë nga pikësynimet e vendosura. Qytetarët e Tiranës duhet të bashkëjetojnë çdo ditë me zhurma prej një mesatare rreth 70 decibel kur kufiri maksimal sipas BE-së duhet të jetë 55 decibel.

Veendi ynë me sa duket ka tendencë të jetë ndër vendet e para në Evropë me një ndotje akustike urbane në këto parametra. Problematike po bëhet situata sidomos gjatë natës, në kohën e gjumit. Si vlerat mesatare të ditës, ashtu edhe ato të natës janë mbi vlerën standarde të BE-së dhe ligjit shqiptar.