Benzema në krizë, asnjë gol në 2015

Eliminimi i Realit të Madridit nga Atletico në Kupën e Mbretit, tashmë ia lë vendin analizave për të gjetur shkaktarët e një minikrize që mund të ketë pasoja të rënda në arritjen e objektivave sezonale. Nëse numri 9 i Atleticos së Madridit Fernando Torres e festoi me dy gola rikthimin e tij në shtëpi, Benzema është kthyer në versionin e tij më të keq. Francezi nuk e ka gjetur ende rrugën e rrjetës në 2015. Në katër ndeshje të këtij viti, ka mundur ta godasë vetëm tri herë portën, ndërsa gjashtë finalizime të tjera kanë përfunduar jashtë.

27-vjecari numëron 5 ndeshje pa shënuar, për herë të fundit e ka dërguar topin në rrjetë ndaj Cruz Azul në botërorin e klubeve, ndërsa në La Liga nuk shënon që nga 29 nëntori, kur u hapi rrugë fitores 2-1 në transfertë me Malagan. Shtërpësinë e francezit po mbulojnë golat e Cristiano Ronaldos dhe të Gareth Bale, që kanë realizuar respektivisht 8 dhe 5 gola që nga takimi i “Rosaledas”. Statistikat janë kokëforta dhe nuk lënë vend për spekulim. Benzema jo vetëm që nuk ka shënuar gjatë 2015, por as nuk po asiston shokët e skuadrës. Në sfidën e fundit ndaj Atleticos së Madridit nuk e goditi asnjëherë portën, dha gjithsej 16 pasime, duke shënuar ndeshjen e dytë me përqindjen më të dobët të pasimeve të sakta, duke mos i kaluar 75%. Rënia e Realit koincidon me formën e dobët të Benzema, ndoshta është thjesht rastësi, por shifrat tregojnë se statistikat e francezit shkojnë paralelisht me ecurinë e los blancos.