Edi Rama i përgjigjet Lulzim Bashës në Facebook

10 Janar 2015, 13:43, Aktualitet CNA

“Kur shpif ndaj tjetrit, thua gjëra që i ke bërë apo je në gjendje t’i besh vetë!”, thotë Emmanuel Kant-i, i cili me kujtohet sa herë i degjoj lehaqentë të shpifin ndaj meje. Dhe kur lehaqenia vjen prej atyre që kanë qenë tetë vjet ne pushtet, kryeministër, ministra të brendshëm apo kanakare të spikatur të pushtetit që iku, thënia e Kantit bëhet tronditëse. Shpifin duke na akuzuar, duke më akuzuar, për çfarë kanë bërë vete! U duket se ne jemi njësoj si ata dhe tanimë që jemi në qeveri, bëjmë atë që bënin ata vetë; bashkëqeverisim me krimin; e përdorim policinë si urë lidhëse me krimin; përdorim kriminelet për të trembur opozitën.

Është e dokumentuar se individi me rekorde kriminale për të cilin na akuzojnë, më akuzojnë – me shpifje për të cilat dy padi penale e civile janë rrugës -, ka qenë aktiv në prishjen e aktiviteteve tona elektorale në betejen e famshme të 2011 për Tiranen! Gjatë këtyre ditëve të kësaj ofensive shpifjesh kam menduar vetëm një gjë: Sa shumë, o Zot sa shumë mirë ka bërë vota e 23 qershorit për këtë vend! Ka shkulur nga pushteti një skote të lidhur fort me krimin dhe ka hapur rrugën per ta çliruar policinë nga kthetrat e krimit! Ajo votë historike i ka dhëne krahë përpjekjes më serioze e më të qendrueshme antikrim që një qeveri shqiptare ka bërë ndonjeherë.

Nuk do t’i kerkoj zyrës sime juridike të shkruajë padinë e dyfishtë edhe për Lulëzim Bashën, njësoj si për dy bashkëpunëtorët e tij më të ngushtë në lidershipin e PD (vajmedet PD ku të lamë e ku na mbete!). Sepse ndryshe nga ata dy prototipat e rrugaçërisë politike që ka në krah, Kryetari i sotem i PD eshte thjesht një peng i trishtueshëm dhe i shumëfishtë që meriton vetëm keqardhje.

Ndërkohë, padyshim, mospaditja prej keqardhjes e Lulezim Bashës, nuk do të përbëjë asnjë pengesë në zbardhjen e çështjes. Le të japin dy shquparaket e tij të vajmedetshëm një provë të vetme për lidhjet për akuzat e këtyre ditëve nga foltorja e PD, dhe Kuvendi le të zgjedhe një kryeministër tjetër. Por në të kundërt, ky është rasti që kjo politike e shpifur e lehaqenies ndaj kundershtarit vetëm për të çoroditur opinionin, të ndëshkohet ligjërisht në mënyrën më shembullore? ? përfundoi Rama statusin e tij në facebook.