Qeveria miraton p/buxhetin/ Rritje maksimale taksash

1 Nëntor 2014, 23:00, Politikë CNA

Qeveria miraton p/buxhetin për vitin 2015, një nga dokumentet më të rëndësishme financiare të të gjithë vitit. Nje buxhet qe ka ne thelb nje rritje drastike taksash qe do rendojne me tej xhepat e shqiptareve.

Buxheti per vitin e ardhshëm është parashikuar të jetë 470 miliard lekë ose 4.7 miliard dollarë.

Në prioritetet e vendosura në këtë buxhet , qeveria ka listuar uljen e borxhit publik nga 71% e prodhimit të brendshëm bruto në 65.5%.

Investimet publike do të jenë 5% e prodhimit kombëtar dhe 100 milion dollarë më shumë se një vit më parë. Ndërsa sektorët kyç do të jenë: arsimi, shëndetësia, energjia dhe bujqësia. Pas miratimi ne qeveri, projekt-buxheti dhe paketa fiskale do te vijnë ne parlament dhe përgjatë nje muaji puna e te gjithë komisioneve parlamentare do te përqendrohet tek diskutimi i tyre

Në paketën fiskale të vitit 2015, Ministria e Financave planifikon të bëjë rritje taksash, efekti i të cilave në buxhet llogaritet rreth 10 miliardë lekë.

Pjesën dominuese në rritjen e të ardhurave do ta mbajë rritja e nivelit të akcizës për cigaret (20 lekë për paketë deri më 31 dhjetor 2015), duhanin me të dredhur (me 1400 lekë/kg deri në fund të vitit 2015), miratuar tashmë në Kuvend, ndërsa pritet rritje edhe për taksën e pijeve alkoolike dhe birrën.

Efekti pozitiv në të ardhurat e buxhetit të shtetit nga rritja e akcizës së cigareve, për vitin 2015, do të jetë rreth 3.4 miliardë lekë dhe 600 milionë lekë nga TVSH-ja.

Ndërsa efekti në të ardhura për rritjen e taksës për duhanin me të dredhur është 200 milionë lekë për vitin e ardhshëm. Për vitin 2015 është parashikuar të ndryshojnë edhe disa zëra të Tatimit mbi të Ardhurat Personale (TAP).

Sipas draftit të përgatitur nga Ministria e Financave, të ardhurat e qytetarëve, veç pagave, do të taksohen me 15%. Po ashtu, me 15% do të taksohen edhe depozitat, dhuratat, të ardhurat nga lojërat e fatit dhe qiratë. Gjithashtu, pritet të vendoset 2% taksë për të ardhurat e kompanisë koncesionare të autostradës Durrës-Kukës. Po ashtu, do të vendosjet TVSH mbi ndërtesat e reja, përfshirë vlerën e tokës.

Një nga taksat nacionale që do të rritet është ajo e qarkullimit që mbahet në çmimin e karburantit. Aktualisht kjo taksë është 17 lekë për litër, por pritet që vitin e ardhshëm të jetë 27 lekë, pa përfshirë këtu TVSH-në (Tatimin mbi Vlerën e Shtuar), qe e rrit edhe me 5.4 lekë.

Pra, rritja mund të jetë 120 lekë për litër. Ndërkohë, përjashtohet nga TVSH-ja sigurimi i automjeteve. Ministria e Financave parashikon uljen e taksave për sektorin e peshkimit, bujqësisë dhe fasonit dhe uljen e tarifave doganore për disa artikuj ushqimorë.