Doktrina per Reformen ne Drejtesi

24 Gusht 2014, 10:52, Politikë CNA

Nga Spartak Ngjela

Gjendja e drejtësisë shqiptare është në krizë. Në fakt në krizë është i gjithë sistemi legal në Shqipëri. Natyrisht që kjo ka arsyet e veta, por ajo që duhet të zhbëhet në mënyrë sa më të shpejtë është ristrukturimi i sistemit, ngritja profesionale në të gjitha aspektet e sistemit, dhe eliminimi real i korrupsionit, i cili, vjen kryesisht në funksion të kësaj krize, dhe ka inonduar të gjithë sistemin politik. Sistemi legal shqiptar, me pjesën e tij me të rëndësishme, pushtetin gjyqësor, nuk jep drejtësi. Çeshtja e drejtësisë shoqërore në Shqipëri, sot është çeshtja më kryesore e zhvillimit kombëtar në përgjithësi dhe e demokracisë në vecanti.

E gjithë kriza morale që po kalon shoqëria shqiptare në sistemin politik të saj, vjen drejtpërdrejt nga kriza në pushtetin gjyqësor dhe në të gjithë sistemin legal. Në një aspekt të përgjithshëm, Shqipëria sot ka hyrë në një kohë që, për ëkzistencën e saj demokratike, i duhet të kryejë pa mëdyshje reformë të thellë në të gjithë sistemin legal. Në një pikë të fundme, moraliteti i një shoqërie apo i një kombi, s?është gjë tjetër vecse drejtësia shoqërore. Kjo është mungesa kryesore e shoqërisë shqiptare: drejtësia shoqërore. Në të vërtetë kjo është një sëmundje njëqindvjecare e shtetit shqiptar, por sot koha e ka sjellë që t?i jepet fund këtij pështjellimi moral për të krijuar më në fund hapësirën moderne të një shteti të drejtë dhe të një shoqërie që di t?i zgjidhë të gjitha konfliktet e saj të brendshme me drejtësi.

Në fuksion të këtij ndryshimi që quhet reformim, duhet të pranojmë se sistemi legal shqiptar nuk është një sistem specifik që ka ardhë si pasojë e një evolucioni të brendshëm të zhvillimit të konceptit të drejtësisë shoqërore në Shqipëri. Sistemi legal shqiptar ekzistues është i huazuar nga të dyja krahët historikë të shtetit modern: ai është një hibrid që ka në ndërtimin e vet edhe kolonat e sistemit legal të vendëve demokratikë, por edhe kolona të caktuara të sistemeve legalë diktatorialë. Në sistemin legal aktual shqiptar janë të implementuara të dyja format e sistemeve, sepse shoqëria shqiptare dihet se ka vetem 20 vjet që ka dalë nga diktatura komuniste.

Shqipëria, si shtet dhe si sistem politik, kaloi në konstitucionalizëm dhe parlamentarizëm që në vitin 1992, por asnjëhërë si shtet nuk u nda dot nga praktikat totalitare që e kishin sunduar pesëdhjetë vjet. Kriza morale e sotme e sistemit politik, nuk është tjetër vecse një mbetje totalitare e sistemit të vjetër legal, në sistemin aktual.
Reformim i sistemit legal do të thotë shrrënjosja përfundimtare e totalitarizmit në përmbajtjen dhe në praktikën e sistemit legal shqiptar, që do të jetë edhe fillimi për të dalë nga kriza morale e vetë sistemit politik?